„ამნესტი ინტერნეიშნელი“: საქართველოს ხელისუფლებამ უნდა უზრუნველყოს მშვიდობიანი შეკრების თავისუფლება

ადამიანის უფლებების დამცველმა ორგანიზაცია „ამნესტი ინტერნეიშნელმა“ გამოაქვეყნა განცხადება, რომელშიც საუბარია საქართველოს ხელისუფლების მიერ საპროტესტო აქციების წინააღმდეგ ძალის გამოყენების შესახებ.

„იმ პირობებში, როცა საქართველოს დედაქალაქ თბილისში გრძელდება ანტისამთავრობო საპროტესტო გამოსვლები, ხელისუფლებამ თავი უნდა შეიკავოს აქციის მშვიდობიანი მონაწილეების მიმართ არასაჭირო ძალის გამოყენებისგან“, წერია ანგარიშში. „ძალა გამოყენებულ უნდა იქნეს მხოლოდ იმ შემთხვევაში, თუკი არაძალადობრივი საშუალებები დიდი ალბათობით ვერ მიაღწევს შედეგს და ხელისუფლება უნდა ეცადოს, მინიმუმამდე დაიყვანოს ზიანი. ისეთი მშვიდობიანი შეკრებების დასაშლელად, რომლებიც არაკანონიერია ადგილობრივი კანონმდებლობით, ძალოვანმა უწყებებმა მაქსიმალური თავშეკავება უნდა გამოიჩინონ და ძალის გამოყენების აუცილებლობის შემთხვევაში, ის უნდა იყოს დემონსტრანტების მხრიდან წინააღმდეგობის პროპორციული; ძალა, რომელიც შეიძლება ზიანის მომტანი იყოს, მიმართული უნდა იყოს მხოლოდ იმ პირების მიმართ, რომლებიც ძალადობრივ ქმედებაში არიან ჩართული“.

„ამნესტი ინტერნეიშნელის“ თანახმად, უკანასკნელი დიდი არასამთავრობო საპროტესტო გამოსვლებისას, 18 და 26 ნოემბერს, ხელისუფლებამ წყლის ჭავლი გამოიყენა უკიდურესად დაბალი ტემპერატურის პირობებში.

უფლებადამცველ ორგანიზაციას მოჰავს ცნობები დემონსტრანტთა დაშავების შესახებ. ამ ცნობების თანახმად, ერთ ადამიანს დაშავებული აქვს თვალი, რამდენიმეს თავის ქალის მოტეხილობა აღენიშნება.

„ადამიანის უფლებების საერთაშორისო სამართლით, მათ შორის სამოქალაქო და პოლიტიკური უფლებების საერთაშორისო კონვენციით და ადამიანის უფლებების ევროპული კონვენციით, რომლის მონაწილეცაა საქართველო, გარანტირებულია მშვიდობიანი შეკრების თავისუფლება. შეკრების თავისუფლების შეზღუდვა შესაძლებელია მხოლოდ მაშინ, როცა ეს სრულიად აუცილებელია, პროპორციულია და კანონითაა დაშვებული,“ ვკითხულობთ განცხადებაში.

„ამნესტი ინერნეიშნელის“ თანახმად, წყლის ჭავლის გამოყენება შეიძლება მხოლოდ იმ შემთხვევაში, თუკი დემონსტრაცია სერიოზულ დაბრკოლებას იწვევს ხანგრძლივი პერიოდის განმავლობაში. „ეს ასე არ იყო 18 და 26 ნოემბერს, როცა დემონსტრანტებს მხოლოდ რამდენიმე საათით ჰქონდათ ბლოკირებული პარლამენტის შენობის შესასვლელი.“

„წყლის ჭავლის გამოყენება არც პროპორციული იყო და არც აუცილებელი“, წერს უფლებადამცველი ორგანიზაცია და შენიშნავს, რომ ამ საშუალების გამოყენება შესაძლებელია მხოლოდ მაშინ, როცა ძალადობის ხარისხი ისეთ დონეს აღწევს, როცა სამართალდამცველებს აღარ შეუძლიათ საფრთხის შეკავება მხოლოდ ცალკეულ მოძალადე პირებზე თავიანთი ძალისხმევის კონცენტრირებით.

„ამნესტი ინტერნეიშნელის“ განცხადებაში საუბარია ასევე დემონსტრანტთა დაკავებებზე.

„ხელისუფლებამ უნდა შეწყვიტოს ე.წ. ადმინისტრაციული პატიმრობის პრაქტიკა - მშვიდობიან დემონსტრანტთა 15 დღემდე დაპატიმრება მხოლოდ იმისთვის, რომ არ დაემორჩილნენ პოლიციის მოთხოვნას, შეეწყვიტათ საჯარო დაწესებულებათა შენობების ბლოკირება. „ეს არღვევს თავისუფალი შეკრების უფლებას, თავისუფლებისა და თავისუფალი სასამართლოს უფლებებს,“ წერს „ამნესტი ინტერნეიშნელი“ და შენიშნავს, რომ ასეთმა პრაქტიკამ საქართველოში შესაძლოა სერიოზული უარყოფითი გავლენა იქონიოს ხალხის წარმოდგენაზე შეკრების თავისუფლების შესახებ.