ვაჟა გაფრინდაშვილის მეუღლე: საჭიროა საერთაშორისო დახმარების უფრო აქტიურად მოთხოვნა
როგორც „ინტერპრესნიუსს“ განუცხადა თამილა ლაფანაშვილმა, საქმეში ჩართულია „წითელი ჯვრის“ ორგანიზაცია, თუმცა, მათმა წარმომადგენელმა დღემდე ვერ მოახერხა ვაჟა გაფრინდაშვილის მონახულება. თამილა ლაფანაშვილი მიიჩნევს, რომ საერთაშორისო დახმარების უფრო აქტიურად მოთხოვნაა საჭირო:
„ვაჟა გადაყვანილია ციხეში, სავარაუდოდ, შედარებით ნორმალურ პირობებში. ასე თქვეს, რომ ახალი გარემონტებულია ციხე. მანამდე ძალიან მძიმე პირობებში იყო. ამას ის ადამიანები ამბობენ, რომლებიც მასთან ერთად იყვნენ და გამოუშვეს. მათი ინფორმაციით, ფიზიკურ ზემოქმედებას ადგილი არ ჰქონია, მაგრამ ძალიან მძიმე პირობებში იყვნენ, არც საჭმელი ჰქონდათ, არც არაფერი.
პირველივე დღიდანვე კავშირზე არიან სახელმწიფო უწყებები, ცდილობენ დაგვეხმარონ. ქალბატონი ქეთი ციხელაშვილი პირადად მეკონტაქტა, ასევე ჯანდაცვის მინისტრის პირველი მოადგილე - თავად მინისტრი არ არის საქართველოში. ასევე, სახელმწიფო უშიშროების სამსახური, სახალხო დამცველი პირველივე დღიდან არიან ჩართულები. ყველა ჩართულია და მეუბნებიან, რომ ყველაფერი კეთდება. დეტალებს, ალბათ, ვერ მეტყვიან.
მე, რა თქმა უნდა, პოზიტიური მოლოდინი მაქვს, რომ აუცილებლად გამოუშვებენ, მაგრამ როდის, არ ვიცი. 2-თვიანი წინასწარი პატიმრობა აქვს შეფარდებული. წითელი ჯვარია ჩართული, რომელიც სამწუხაროდ უძლურია, რომ შევიდეს მასთან, ამიტომ უფრო უნდა გავაძლიეროთ, უფრო აქტიურად უნდა ვთხოვოთ დახმარება საერთაშორისო საზოგადოებას. დღემდე ვერ შევიდნენ და ვერ მოინახულეს პატიმარი, თუ რა მდგომარეობაშია.
მე იმედი მაქვს ადგილობრივი ექიმებისაც, ვისთან ერთადაც ადრე გვისწავლია“, - განაცხადა თამილა ლაფანაშვილმა.
ექიმ ვაჟა გაფრინდაშვილს ოკუპირებული ცხინვალის დე ფაქტო სასამართლომ 15 ნოემბერს 2-თვიანი პატიმრობა შეუფარდა. დე ფაქტო უწყება მას „საზღვრის“ განზრახ უკანონო კვეთას ედავება.
ექიმი ვაჟა გაფრინდაშვილი საოკუპაციო გამყოფ ხაზთან 9 ნოემბერს დააკავეს, საქართველოს სახელმწიფო უწყებებმა ამის შესახებ განცხადება 4 დღის შემდეგ გააკეთეს.