სუს-ი: დეზინფორმაციაა დე ფაქტო სახელმწიფო უშიშროების კომიტეტის განცხადება "საზღვართან" სროლის შესახებ
„ეს არის მორიგი დეზინფორმაცია და პროვოკაციული განცხადება. ინფორმაცია სიმართლეს არ შეესაბამება“, - უპასუხეს რადიო თავისუფლებას სუს-ში.
რუსეთის მიერ ოკუპირებული ცხინვალის რეგიონის დე ფაქტო სახელმწიფო უშიშროების კომიტეტი აცხადებს, რომ „5 ნოემბერს, სამხრეთ ოსეთთან მოსაზღვრე ხაშურის მუნიციპალიტეტის სოფელ კოდასთან ავტომატური ცეცხლსასროლი იარაღის გამოყენების ფაქტი უკავშირდება შეიარაღებულ ინციდენტს საქართველოს შინაგან საქმეთა სამინისტროს თანამშრომლებსა და ადგილობრივ ქართველ მოსახლეობას შორის“.
ამ შინაარსის ინფორმაცია დე ფაქტო უშიშროების კომიტეტმა დღეს, 7 ნოემბერს გაავრცელა. მისივე განცხადებით, კონფლიქტის მიზეზად იქცა კოდის მცხოვრებთა უკმაყოფილება ჩორჩანა-ყობი-კოდა-ატოცის რაიონში საქართველოს შინაგან საქმეთა სამინისტროს გაძლიერებული საგუშაგოების განთავსების, დაძაბულობის ესკალაციის და სოფლის მაღლობზე ქართული დროშების აღმართვის მცდლობების გამო.
საოკუპაციო რეჟიმი იმასაც ირწმუნება, რომ ინციდენტის შემდეგ, საქართველოს შინაგან სამინისტროს თანამშრომლებმა კოდის მცხოვრებლებზე განახორციელეს ზეწოლა და აიძულებდნენ მიეცათ ჩვენება, რომ სროლა დაკავშირებული იყო საქართველოს ტერიტორიაზე სამხრეთ ოსური სადაზვერვო ჯგუფის შესვლასთან, კატეგორიული უარის შემდეგ კი, სოფელი კოდა მთლიანად დაიკეტა ქართული და უცხოური საზოგადოებრივი ორგანიზაციებისა და მედიისთვის.
მას შემდეგ, რაც აგვისტოს ბოლოს, ხაშურის მუნიციპალიტეტის სოფელ ჩორჩანასთან, საქართველოს ცენტრალური მთავრობის მიერ კონტროლირებულ რაიონში პოლიციის საგუშაგო განთავსდა, ოკუპირებული ცხინვალის რეგიონის დე ფაქტო ხელისუფლება თბილისს კვირაში რამდენჯერმე ადანაშაულებს პროვოკაციებსა და დაძაბულობის ესკალაციის მცდელობაში.