ვიტალი საფაროვის საქმე: ექსპერტი და გამომძიებელი მეექვსე სხდომიდან
20 მაისს, 25 წლის უფლებადამცველის, ვიტალი საფაროვის მკვლელობის საქმეზე მიმდინარე სასამართლო პროცესის რიგით მეექვსე სხდომაზე, დაკითხეს ლევან სამხარაულის სახელობის სასამართლო ექსპერტიზის ეროვნული ბიუროს ექსპერტები და ის გამომძიებელი, ვინც პირველმა დაათვალიერა მკვლელობის ადგილი.
პირველი, სასამართლოს წინაშე, სასამართლო-სამედიცინო ექსპერტი, გიორგი მაღრაძე წარსდგა. სწორედ მან დაათვალიერა 2018 წლის 30 სექტემბერს დიუმას ქუჩის #28-ში მოკლული ვიტალი საფაროვის ცხედარი, რომელსაც, მისი სიტყვებით, ერთი ნაკვეთი და შვიდი ნაჩხვლეტი ჭრილობა ჰქონდა მიყენებული.
დაზიანებული ჰქონდა გული, ფილტვები, დაზიანებები აღენიშნებოდა სახის მარჯვენა ნახევარზეც.
ექსპერტმა სასამართლოს დეტალური ინფორმაცია მიაწოდა მოკლული ვიტალი საფაროვის ჭრილობების ზომის, დანის დარტყმის მიმართულების, მის სხეულზე არსებული დაზიანებების შესახებ.
ექსპერტების დასკვნები
ბრალდებულ ავთანდილ კანდელაკიშვილის ადვოკატი, ზურაბ ბეგიაშვილი დაინტერესდა, კონკრეტულად რომელი ჭრილობა აღმოჩნდა საფაროვისთვის სასიკვდილო.
ექსპერტი გიორგი მაღრაძე: 4 ჭრილობა. მე-2, მე-3, მე-4 და მე-5 ჭრილობები, რომლებიც იყო შემავალი ჭრილობები გულმკერდის და მუცლის ღრუში, რამაც გამოიწვია შინაგანი და გარეგანი სისხლდენა.
ზურაბ ბეგიაშვილი: დაზიანებული იყო თუ არა ვიტალი საფაროვის გული?
გიორგი მაღრაძე: დიახ, იყო.
ზურაბ ბეგიაშვილი: რამდენად შეიძლებოდა დაზიანებულ გულზე მასაჟის ჩატარება და რა ტიპის ეფექტი შეიძლება ამას ჰქონოდა?
გიორგი მაღრაძე: მე ამ კითხვაზე ვერ გიპასუხებთ, მაგ კითხვაზე პასუხს შესაბამისი სპეციალისტი სჭირდება.
ზურაბ ბეგიაშვილი: სამედიცინო ლოგიკაა - დაჩქარდებოდა თუ არა გულიდან, გულის მასაჟის დროს, სისხლის გამოდევნა?
გიორგი მაღრაძე: მე პირადად ამაზე საუბარი არ შემიძლია. ზოგადად, ექიმმა არ იცის, კონკრეტულ მომენტში გული დაზიანებულია თუ არა, ის ცდილობს გულის ამუშავებას. რამდენად გაართულებდა გულის მასაჟი მდგომარეობას? სისხლის გამოდინება მოიმატებდა, ცხადია, თუმცა სისხლის დანაკარგი, ამ შემთხვევაში, ისედაც დიდი იქნებოდა, რადგან გულის გარდა, გარდაცვლილს სხვა ჭრილობებიც ჰქონდა.
ზურაბ ბეგიაშვილი: არის თუ არა სიმთვრალე სიკვდილის დამაჩქარებელი?
გიორგი მაღრაძე: მე ამაზე ვერ გიპასუხებთ. ეს ცდება ჩემს კომპეტენციას.
ზურაბ ბეგიაშვილი: თქვენს მიერ, ჭრილობების შესწავლის შემდეგ, თუ შეგიძლიათ თქვათ, რომ მხოლოდ ერთი ან ორი საგანი იყო გამოყენებული? რამდენი საგანი იყო გამოყენებული მკვლელობისას?
გიორგი მაღრაძე: ორი საგანი.
ზურაბ ბეგიაშვილი: ერთსა და იმავე საგანს შეუძლია სხვადასხვა ზომის ჭრილობა მიაყენოს ადამიანს?
გიორგი მაღრაძე: დიახ, შესაძლებელია.
ლევან სამხარაულის სახელობის ექსპერტიზის ეროვნული ბიუროდან კიდევ სამი ექსპერტი დაკითხეს.
თამარ კაიშაურმა საფაროვის სისხლსა და შარდში ეთილის სპირტის არსებობა დაადასტურა. თუმცა, ადვოკატის კითხვაზე, აღმოჩენილი ნივთიერება რა დოზით სიმთვრალეს გამოიწვევდა, უპასუხა, რომ ეს ექიმი-ნარკოლოგის განსასაზღვრია და არა მისი.
ზურაბ ბეგიაშვილი: და იმას თუ ადასტურებთ რომ ის აქტიურად ნასვამი იყო?
თამარ კაიშაური: არა, მე ამას ვერ ვადასტურებ, მე მხოლოდ იმას ვადასტურებ, რა ნივთიერებაც აღმოჩნდა მის სისხლში.
სამხარაულის ბიუროდან ასევე დაკითხეს ექსპერტი გულნაზი ტატანაშვილი, რომლის თქმითაც, მკვლელობის ერთ-ერთ თვითმხილველის, ირაკლი ბელთაძეს სხეულზე რამდენიმე დაზიანება აღენიშნებოდა, თუმცა ეს იყო მსუბუქი დაზიანებები, ძირითადად იდაყვის არეში - მან ტანსაცმლის გახდასა და დამატებით დათვალიერებაზე უარი განაცხადა.
ექსპერტმა კონსტანტინე ცქიტიშვილმა სასამართლო-სამედიცნო ექსპერტიზა ბრალდებულებს, გიორგი სოხაძესა და ავთანდილ კანდელაკიშვილს ჩაუტარა. მისი სიტყვებით, სოხაძეს გარეგნული დაზიანებები არ აღენიშნებოდა, კანდელაკიშვილს კი ჰქონდა მსუბუქი დაზიანებები, რაც სიცოცხლისთვის სახიფათო არ ყოფილა.
პოლიციელის ნაამბობი
30 სექტემბრის ღამით, მკვლელობის ადგილას, მთავარი გამომძიებელი ლაშა ტუხაშვილი მივიდა. ჩატარდა შესაბამისი საგამოძიებო მოქმედებები, ამოიღეს კამერების ჩანაწერები. იმავე დღეს, 30 სექტემბერს დააკავეს გიორგი სოხაძე და ავთანდილ კანდელაკიშვილი. ორივეს ბრალი წარედგინა.
ზურაბ ბეგიაშვილი: სად იპოვეთ სისხლის ნაკვალევი შემთხვევის ადგილთან ყველაზე ახლოს და ყველაზე შორს?
ლაშა ტუხაშვილი: ყველაზე ახლოს, დიუმას #28-ში, კიბეებთან და ყველაზე შორს, ვერცხლის ქუჩაზე, #50-ში, ქვაფენილზე.
ზურაბ ბეგიაშვილი: რატომ არ ჩაიწერეთ შემთხვევის ადგილის დათვალიერების პროცესი ვიდეოზე?
ლაშა ტუხაშვილი: არ მივიჩნიე საჭიროდ.
ზურაბ ბეგიაშვილი: საიდან მოხვდა პრესაში იმავე დილით „საბვეის“ კამერის „პირატული“ ჩანაწერი?
ლაშა ტუხაშვილი: არ ვიცი, საიდან სად რა მოხვდა. არ მინახავს.
ზურაბ ბეგიაშვილი: ბელთაძემ თუ გითხრათ მკვლელობის მიზეზი?
ლაშა ტუხაშვილი: არ მახსოვს.
ზურაბ ბეგიაშვილი: ბელთაძეზე ხომ არ მოგიხდენიათ ზეწოლა?
ლაშა ტუხაშვილი: არა. არავინ არავის დამუქრებია.
ზურაბ ბეგიაშვილი: ზურაბ მორჩილაძე ხომ არ გეცნობათ?
ლაშა ტუხაშვილი: არ ვიცი.
ზურაბ ბეგიაშვილი: თუ ნახეთ სიუჟეტი "რუსთავი 2"-ზე, სადაც საუბარი იყო იმაზე, რომ მორჩილაძეზე მოხდა სიტყვიერი და ფიზიკური ძალადობა და ის უარს აცხადებს პრესასთან გამოჩენაზე.
ლაშა ტუხაშვილი: არა, არ ვიცი.
ზურაბ ბეგიაშვილი: თუ იცით, რომ მორჩილაძე სამხედრო პირი იყო?
ლაშა ტუხაშვილი: არ ვიცი.
ბრალდებული გიორგი სოხაძე: გეხვეწებოდით თუ არა, რომ თანახმა ვიყავი ჩვენებაზე, ოღონდ იურიდიული დახმარება მინდოდა, კანონში გარკვევა? გეხვეწეთ თუ არა, რომ ჩვენებას მოგცემდით, ოღონდ ადვოკატი მინდოდა?
ლაშა ტუხაშვილი: არ ყოფილა ასეთი ფაქტი. სოხაძემ, უბრალოდ გამოიყენა დუმილის უფლება.
გიორგი სოხაძე: მღეროდით თუ არა ბედნიერი სახით, როდესაც მე მოწმის სტატუსი ბრალდებულის სტატუსით შემიცვალეთ?
ლაშა ტუხაშვილი: არა, ბატონო, არა.
გიორგი სოხაძე: კარგით. მეტი კითხვები არ მაქვს, ამ ადამიანმა ჩემი უფლებები დაარღვია.
სასამართლო სხდომების ქრონიკა:
პირველი სასამართლო სხდომა ვიტალი საფაროვის საქმეზე 2019 წლის 16 აპრილს, აქციის ფონზე ჩატარდა. „არა რასიზმს“, „არა ქსენოფობიას“ - ამგვარი ტრანსპარანტებით მოითხოვეს სიძულვილის მოტივით ჩადენილ დანაშაულში ბრალდებულთა დასჯა.
ამ პროცესზე დაცვის მხარე ავთანდილ კანდელაკიშვილისთვის პატიმრობის ნაცვლად 10 ათას ლარიანი გირაოს გამოყენებას და გიორგი სოხაძის გათავისუფლებას ითხოვდა. თუმცა თბილისის საქალაქო სასამართლომ ორივე წინასწარ პატიმრობაში დატოვა.
მეორე სხდომა 24 აპრილს ჩატარდა. მაშინ სხდომის დამკვირვებელმა, სვიტლანა ვალკომ ფეისბუკზე დაწერა, რომ დაცვის მხარე მოითხოვდა სასამართლოს გადადებას და პროცესის ამ გზით გაწელვას და რომ დაცვის მხარის განცხადებით, მედია სასამართლო პროცესზე ზეწოლას ახდენდა.
მესამე სასამართლო პროცესზე, 3 მაისს, ვიტალი საფაროვის მეგობრები და ნაცნობები დაკითხეს, ბარმენები, რომლებიც ერთხმად მიანიშნებდნენ ბრალდებულების სიმპათიებზე ნეონაცისტური იდეოლოგიის მიმართ, ასევე, შესაბამის ქცევაზე.
მომდევნო სხდომა ადვოკატ ზურაბ ბეგიაშვილის გამოუცხადებლობის გამო გადაიდო.
მეოთხე სხდომა ამ საქმის მთავარი მოწმის, ნიკოლოზ შანავას დაკითხვის ფონზე გაგრძელდა. შანავა ბრალდებულების მეგობარი და მკვლელობის თვითმხილველია. საქმეში მას მოწმის სტატუსი აქვს. შანავა იყო პირველი, ვინც ვიტალი საფაროვს დაარტყა. თუმცა როგორც თავად და კიდევ ერთი მოწმე, ბელთაძე აცხადებენ, შემდეგ ის ჩხუბში აღარ ჩარეულა, რისიც ბრალდებულების დაცვის მხარეს არ სჯერა - ადვოკატები აცხადებენ, რომ ტყუის შანავაც და ტყუის ბელთაძეც.
ირაკლი ბელთაძე მეხუთე სხდომაზე დაკითხეს. სწორედ ბელთაძე იყო ის პირი, ვინც პირველად გავიდა კონტაქტზე ბარ „ვარშავასთან“ მყოფ სოხაძესთან, კანდელაკიშვილთან და შანავასთან. კონფლიქტიც სწორედ ამ კონტაქტის შემდეგ გაღრმავდა.
„ჩართულობის და განვითარების ცენტრის“ თანამშრომელი, 25 წლის ვიტალი საფაროვი 2018 წლის 30 სექტემბრის ღამით მოკლეს. დიუმას ქუჩის 28 ნომერში. ბარ „ვარშავას“ და კაფე „საბვეის“ მიმდებარე ტერიტორიაზე.
ვიტალი საფაროვის მკვლელობაში ბრალდებულებს, გიორგი სოხაძეს (23 წლის) და ავთანდილ კანდელაკიშვილს (20 წლის), ბრალი ედებათ განზრახ, დამამძიმებელი გარემოებებით - ჯგუფურად ჩადენილ მკვლელობაში რასობრივი, რელიგიური, ეროვნული ან ეთნიკური შეუწყნარებლობის გამო (სსსკ 109.2.დ.ე.).
ეს დანაშაული სასჯელის სახით ითვალისწინებს 13-დან 17 წლამდე თავისუფლების აღკვეთას. ბრალდებულები თავს დამნაშავედ არ ცნობენ.
საფაროვის საქმეზე მეშვიდე სასამართლო სხდომა 23 მაისს დაინიშნა.