რადიო თავისუფლების კორესპონდენტი თურქმენეთიდან გაემგზავრა ციხიდან გამოსვლის შემდეგ
მის დაპატიმრებას პოლიტიკურად მოტივირებულად მიიჩნევენ უფლებადამცველი ორგანიზაციები და გაეროს წარმომადგენლები.
ნეპესკულიევი 23 მარტს გაფრინდა სტამბულში მას შემდეგ, რაც ორი დღით ადრე მიიღო თურქმენეთიდან გამგზავრების უფლება. ის 2018 წლის 19 მაისს გაათავისუფლეს ციხიდან.
უფლებადამცველები აცხადებენ, რომ ნარკოტიკები, კერძოდ, მედიკამენტი ტრამადოლი, რომლის შენახვაც თურქმენეთში აკრძალულია, ნეპესკულიევს სასტუმროს ოთახში ჩაუდეს. ბრალდებები მიჩნეულია ანგარიშსწორებად მისი რეპორტაჟებისათვის.
ნეპესკულიევი 2015 წლის 7 ივლისს გაუჩინარდა და მასთან რამდენიმე კვირა ვერ ხერხდებოდა კონტაქტის დამყარება, სანამ სასამართლო დამნაშავედ ცნობდა ნარკოტიკებთან დაკავშირებული ბრალდების საფუძველზე.
რადიო თავისუფალი ევროპა/რადიო თავისუფლებისათვის მომზადებულ ვიდეორეპორტაჟებში ნეპესკულიევი იუწყებოდა ინფრასტრუქტურის ხარვეზებსა და ეკონომიკურ უთანასწორობაზე დასავლეთ თურქმენეთში.
ამ ქვეყანაში რთე/რთ-ის სხვა კორესპონდენტებიც არაერთხელ გამხდარან რეპრესიების, კერძოდ ფიზიკური თავდასხმების, მუქარისა და, უფლებადამცველთა აზრით, დაუსაბუთებელი ბრალდებების სამიზნე.