გაფიცული სოცმუშაკები აქციას მართავენ
მთავრობის ადმინისტრაციის შენობის წინ კარვებია გაშლილი.
სოციალური მომსახურების სააგენტოში დასაქმებული სოციალური მუშაკები საქართველოს მასშტაბით გაიფიცნენ. მათი მოთხოვნებია: ცენტრებში ფსიქოლოგების და იურისტების დამატება; სოციალური მუშაკების რაოდენობის ზრდა; საპროცესო წარმომადგენლობა; ტრანსპორტირების საკითხის მოგვარება; ხელფასების ზრდა, ან ცალკე თანხის გამოყოფა ბენეფიციარებთან გეგმური ვიზიტებისთვის.
სოცმუშაკები პრემიერ-მინისტრთან შეხვედრასაც ითხოვენ.
გაფიცვას წინ უძღოდა თითქმის თვენახევრიანი მედიაციის პროცესი, რომელიც უშედეგოდ დასრულდა. სოციალურმა მუშაკებმა სოციალური მომსახურების სააგენტოს წინააღმდეგ დავა მიმდინარე წლის 8 თებერვალს დაიწყეს.
გაფიცვის დაწყებამდე სოციალურმა მუშაკებმა გაავრცელეს ინფორმაცია, რომ ზოგიერთ მათგანზე სოციალური მომსახურების სააგენტოს ხელმძღვანელთა მხრიდან იყო ზეწოლა და მუქარა, რომ გაფიცვაში მონაწილეობა არ მიეღოთ.