Իռլանդիան, Նորվեգիան և Իսպանիան պաշտոնապես ճանաչել են Պաղեստին պետությունը. Իսրայելն իր դեսպաններին շտապ հետ է կանչել
Իռլանդիան, Նորվեգիան և Իսպանիան պաշտոնապես ճանաչել են Պաղեստինը որպես առանձին պետություն՝ ստիպելով Իսրայելին հետ կանչել իր դեսպաններին Իռլանդիայից և Նորվեգիայից:
Չորեքշաբթի ելույթ ունենալով՝ Իռլանդիայի վարչապետ Սայմոն Հարիսն ասել է. «Այսօր Իռլանդիան, Նորվեգիան և Իսպանիան հայտարարում են, որ ճանաչում են Պաղեստին պետությունը, մեզանից յուրաքանչյուրը կձեռնարկի այն ազգային քայլերը, որոնք անհրաժեշտ կլինեն այդ որոշումն ուժի մեջ մտցնելու համար։ Վստահ եմ, որ այլ երկրները կմիանան մեզ՝ առաջիկա շաբաթների ընթացքում կատարելով այս կարևոր քայլը»:
Իռլանդիայի կառավարությունը պնդում է, որ երկու պետության ստեղծմամբ ուծումն էական նշանակություն ունի Մերձավոր Արևելքի տարածաշրջանում կայուն խաղաղության համար, որը հոկտեմբերից գտնվում է ՀԱՄԱՍ-Իսրայել բախման կիզակետում:
Իսպանիայի վարչապետ Պեդրո Սանչեսը խորհրդարանում հայտարարել է, որ մայիսի 28-ին կճանաչի Պաղեստին պետությունը։
«Հաջորդ երեքշաբթի՝ մայիսի 28-ին, Իսպանիան Նախարարների խորհրդում կհաստատի Պաղեստին պետության ճանաչումը»,- ասել է Սանչեսը։
Նշենք, որ այսօր Նորվեգիայի վարչապետ Յոնաս Գար Ստյորեն հայտարարել էր, որ իր երկիրը պաշտոնապես ճանաչում է Պաղեստինը որպես պետություն։
«Մերձավոր Արևելքում խաղաղությունն անհնար է, քանի դեռ չկա ճանաչում», - ասել է նա՝ մանրամասնելով, որ սկանդինավյան երկրի որոշումն ուժի մեջ կմտնի երեքշաբթի՝ մայիսի 28-ին։
«Ահաբեկչությունն իրականացրել են ՀԱՄԱՍ-ը և զինյալ խմբավորումները, որոնք չեն աջակցում երկու պետության ստեղծմանը: Պաղեստինը անկախ պետության հիմնարար իրավունք ունի», - ասել է Նորվեգիայի կառավարության ղեկավարը։
Այս հայտարարությունների ֆոնին Իսրայելի արտգործնախարարը դեսպաններին հրամայել է Իռլանդիայից և Նորվեգիայից անհապաղ վերադառնալ Իսրայել։
ԱԳ նախարար Իսրայել Կացը X-ում հրապարակված գրառման մեջ նա ասել է, որ ճանաչումը կարող է խոչընդոտել Գազայում պահվող իսրայելցի պատանդներին վերադարձնելու ջանքերին և ավելի քիչ հավանական է դարձնում հրադադարը՝ «պարգևատրելով ՀԱՄԱՍ-ին և Իրանի ջիհադիստներին»:
«Իսրայելը չի լռի նրանց դեմ, ովքեր խաթարում են նրա ինքնիշխանությունը և վտանգի տակ են դնում նրա անվտանգությունը»,- հավելել է նա։