«Արհամարհելով Թրամփին և Էրդողանին». The Guardian-ի և Daily Mail-ի անդրադարձերը՝ Սենատում Հայոց ցեղասպանության բանաձևի ընդունմանը
Միացյալ Նահանգների Սենատը նախօրեին ճանաչել է Հայոց ցեղասպանությունը ճանաչող բանաձևը, ինչին անդրադարձել են բազմաթիվ միջազգային լրատվամիջոցներ, այդ թվում՝ հեղինակավոր The Guardian պարբերականը:
Անդրադարձի հեղինակ Ջուլիան Բորգերը նկատում է, որ Օսմանյան կայսրության կողմից 1,5 մլն հայերի սպանությունը որպես ցեղասպանություն ճանաչող բանաձևն ընդունվել է՝ արհամարհելով ԱՄՆ նախագահ Դոնալդ Թրամփին և Թուրքիայի նախագահ Ռեջեփ Թայիփ Էրդողանին:
«Սա ամերիկահայերի կողմից ավելի քան կես դար տարվող արշավի կուլմինացիան էր»,- գրում է հեղինակը՝ նկատելով, որ մինչև հիմա Թուրքիան, օգտագործելով ՆԱՏՕ-ի շրջանակում ԱՄՆ-ի դաշնակիցը լինելու լծակը, կանխել է Հայոց ցեղասպանության ճանաչումը և երկկողմ հարաբերությունների ոլորտում լուրջ հետևանքներով սպառնացել: Մինչդեռ Սպիտակ տունը, վախենալով է՛լ ավելի բարդացնել առանց այդ էլ լարված հարաբերություններն Էրդողանի հետ, փորձել է սառեցնել Սենատի քվեարկությունը:
«Վերջին մի քանի շաբաթվա ընթացքում Հանրապետական կուսակցության երեք տարբեր սենատորներ Սենատում արգելափակել են համապատասխան բանաձևը, սակայն անցած հինգշաբթի Թրամփին չհաջողվեց Սենատում իր աջակիցներից որևէ մեկին համոզել ընդդիմանալ բանաձևին»,-շարունակում է Բորգերը:
«Նախագահի մոտ ուղղակի վերջացան հանրապետական սենատորները»,- ԱՄՆ Հայ դատի հանձնախմբի գրասենյակի գործադիր տնօրեն Արամ Համբարյանի խոսքը մեջբերում է հեղինակը: Ըստ Համբարյանի՝ արդեն ժամանակն է, որ նախագահը ևս ընդդիմանա Էրդողանին:
Ինչ վերաբերում է բանաձևի գլխավոր հեղինակ սենատոր Բոբ Մենենդեսին, ապա քվեարկությունից հետո նա չի կարողացել զսպել հուզմունքը:
«Սենատի համար հարիր է պատմության ճշմարիտ կողմի կողքին կանգնելը»,-ասել է սենատորը:
Today, by passing my #ArmenianGenocide resolution, the Senate finally stood up to confirm history: What happened in Armenia was – most assuredly – genocide.
— Senator Bob Menendez (@SenatorMenendez) 12 декабря 2019 г.
There is no other word for it.
There is no euphemism.
There is no avoiding it. pic.twitter.com/Kna92CZDcV
Պատմական քվեարկությանն անդրադարձել է նաև Daily Mail-ը՝ հիշեցնելով, որ Սենատը վիճահարույց բանաձևն ընդունել է միայն 4-րդ փորձից հետո, և որ նախորդ երեքն արգելափակվել են Սպիտակ տան խնդրանքով:
Նշվում է, որ ընդունված բանաձևը, որն է՛լ ավելի կսրի Վաշինգտոնի և Անկարայի հարաբերությունները, իրավական տեսանկյունից ուժ չունի, և նախագահ Թրամփը պարտավոր չէ այն ստորագրել:
«Տեղի ունեցածը ցեղասպանություն է, և պատասխանտվությունը կրում է Թուրքիան: Գործընկերներիս ասում եմ, որ ցեղասպանությունը ցեղասպանություն է: Այս կառուցի անդամները պետք է քաջություն ունենան և դա ասեն հստակ, առանց տարակուսանքի»,-քվեարկությունից հետո ասել է Մենենդեսը՝ գոհունակություն հայտնելով այն առնչությամբ, որ բանաձևն ընդունվել է դեռ այն ժամանակ, երբ Ցեղասպանությունը վերապրածներից ոմանք ողջ են: