Մամեդյարովը հայտարարել է, որ Հայաստանը ԼՂ հարցի շուրջ բանակցությունների ժամանակ առաջարկել է «Լավրովի պլանը»
Ադրբեջանի արտգործնախարար Էլմար Մամեդյարովը հայտարարել է, որ Ղարաբաղյան հակամարտության կարգավորմանն ուղղված բանակցություններին այլընտրանք չկա: Այս մասին տեղեկացնում է minval.az կայքը:
«Բանակցությունների միջոցով խաղաղության հասնելը շատ բարդ գործընթաց է, և ոչ ոք առանց մեզ այս խնդիրը չի լուծի: Բոլոր տարբերակները պետք է սեղանին լինեն: Անկյունաքարային հարց է՝ ի՞նչ կլինի հետո: Պետք է ռազմավարական համբերություն ունենալ հակամարտության լուծման համար: Ես չեմ հավատում, որ բանակցային գործընթացը կանգ կառնի: Ես չեմ կարծում, որ հայկական կողմից ինչ-որ մեկը հետաքրքրված է բանակցություններից դուրս գալով: Մենք նույնպես միշտ այդ մասին ենք ասում (խաղաղ բանակցությունների անհրաժեշտության մասին)»,- նշել է Մամեդյարովը CBC հեռուստաալիքին տված հարցազրույցի ժամանակ:
Մամեդյարովի խոսքով՝ հայկական կողմի «գործողությունների և հայտարարությունների մեջ գերակշռում են հույզերը»:
Ադրբեջանցի նախարարը նշել է նաև, որ «բանակցային գործընթացը պետք է հետևի հասարակության ներքին տրամադրություններին և՛ Հայաստանում, և՛ Ադրբեջանում:
«Սա բնական ընթացք է: Կրքերը բորբոքված են և՛ Հայաստանում, և՛ Ադրբեջանում»,- ասել է նա:
Մամեդյարովի խոսքով՝ ինքը չի հասկանում, թե ինչու հայկական կողմը թույլ չի տալիս «Ղարաբաղի հայկական համայնքին շփվել ադրբեջանական համայնքի հետ»:
Ադրբեջանի արտգործնախարարը նշել է նաև, որ «նույնիսկ մարտական գործողությունների վերսկսման պարագայում բանակցային գործընթացը պետք է իր տեղը ունենա, քանի որ պատերազմը չի կարող հավերժ տևել»:
Նա հավելել է, որ հայ գործընկերոջ հետ բանակցությունների ժամանակ քննարկվում են «կոնկրետ և իրական պահեր»: Ադրբեջանի արտգործնախարարը նշել է, որ բանակցությունների ընթացքում «հայկական կողմից տարբեր փաստաթղթեր են հայտնվել, որոնցից վերջինը «Լավրովի պլանն» է»:
«Լավրովի պլանը» հագեցած քննարկումների արդյունք է, որոնք տեղի են ունեցել մոտավորապես երկու տարի առաջ Մոսկվայում: Բայց այն ամեն դեպքում հիմնվում է «Մադրիդյան սկզբունքների» վրա: Կա Մինսկի խմբի համանախագահների 2019 թվականի մարտի 9-ի հայտարարությունը, որում հստակեցված է միջնորդների դերը բանակցություններում առաջ գնալու համար: Նպատակը («Լավրովի պլանի») շատ պարզ է. փուլային լուծում»,-ասել է Մամեդյարովը:
Նրա խոսքով՝ առաջին փուլում պետք է լինի «զորքերի դուրսբերում, ադրբեջանական բնակչության վերադարձ, անվտանգության ապահովում, կապերի հաստատում»:
Ըստ Մամեդյարովի՝ իրենց առաջարկը Հայաստանին կարելի է բնորոշել որպես «խաղաղություն՝ բարգավաճման տեսլականով»: