Վարչապետի տիկնոջ «Իմ քայլը» հիմնադրամին 7 ամսում փոխանցվել է շուրջ 1 մլն 700 հզր դոլար
ՀՀ վարչապետի տիկնոջ՝ Աննա Հակոբյանի « Իմ քայլը» հիմնադրամի գործունեության, Աննա Հակոբյանի այցերի, ստացված գումարի և այլ հարցերի վերաբերյալ Tert.am-ը հարցում էր ուղարկել հիմնադրամին: Նշենք, որ հիմնադրամը ստեղծվել է 2018-ի հուլիսին։ Նշված գումարը հավաքագրվել է 7 ամսում։
Ըստ հարցման պատասխանի՝ հիմնադրամը ստեղծման պահին (հիմնադրամը ստեղծվել է 2018 թվականի հուլիս ամսին) միջոցներ չի ունեցել: Ս.թ. փետրվարի 15-ի դրությամբ ( ստեղծման պահից 7 ամսվա ընթացքում) «Իմ քայլը» հիմնադրամին փոխանցվել է 859 մլն 55 հզր դրամ (մոտ 1 մլն 746 հզր դոլար), նվիրատվությունների մի մասը նպատակային նվիրատվություններ են:
Հիմնադրամի հիմնադրման օրվանից Աննա Հակոբյանն այցելել է երկու երկիր:
Հարցին, թե հիմնադրամի հիմնադրման օրվանից մինչև հունվարի 20-ը քանի՞ երկիր է աշխատանքային նպատակով ուղևորվել Աննա Հակոբյանը, հիմնադրամից պատասխանել են.
«Հիմնադրամի հիմնադրման օրվանից մինչև հունվարի 20-ը Աննա Հակոբյանը մեկնել է աշխատանքային երկու ուղևորության՝ 2018 թ. նոյեմբերի 11-13-ը՝ Մոսկվա, 2018 թ. դեկտեմբերի 11-17-ը՝ Շվեյցարիա։ Երկու ուղևորությունների արդյունքում միասին հիմնադրամի գործունեության համար հավաքագրվել է շուրջ 173 միլիոն ՀՀ դրամին համարժեք գումար»։
Հարցին, թե Կառավարության կազմից և ոչ միայն ովքեր են որպես ՀՀ վարչապետի տիկնոջ ուղեկցում Աննա Հակոբյանին արտերկրում, հայտնել են, որ աշխատանքային երկու ուղևորությունների ընթացքում Աննա Հակոբյանին ուղեկցել են ՀՀ վարչապետի աշխատակազմի արարողակարգի բաժնի երկու աշխատակիցներ. «Մոսկվա կատարած ուղևորության ընթացքում պատվիրակության կազմում եղել է նաև «Իմ քայլը» հիմնադրամի գործադիր տնօրեն Հովհաննես Ղազարյանը։ Շվեյցարիա կատարած ուղևորությանը, վերը նշված անձանցից բացի, մասնակցել է նաև մամուլի քարտուղար Հասմիկ Հարությունյանը»։
Ինչ վերաբերում է հարցին, թե երկրներում ինչ դասի հյուրանոցներում և որ հյուրանոցներում է հանգրվանել Աննա Հակոբյանը, հիմնադրամից հայտնել են. «Մոսկվայում հանգրվանել է Ararat Park Hyatt հյուրանոցում, սենյակը տրամադրվել է 13,000 ռուբլով (նմանատիպ սենյակի ստանդարտ արժեքը 25-26 հազար ռուբլի է)։ Շվեյցարիայում հանգրվանել է La Réserve Genève հյուրանոցում, սենյակի արժեքը՝ 305 շվեյցարական ֆրանկ։ ՌԴ-ում մնացել է 2 օր, Շվեյցարիայում՝ 5 օր»։
Հարցին, թե որքան է կազմում հիմնադրամի բյուջեն 2019 թ. հունվարի 20-ի դրությամբ, հայտնել են, որ փետրվարի 15-ի դրությամբ հիմնադրամի հաշվեհամարներին մուտք է արվել 859 մլն 55 հզր դրամի նվիրատվություն։ Այդ գումարի մի մասը՝ 454 մլն 626հզր դրամ, նպատակային նվիրատվություններ են։ Մասնավորապես, նվիրատուները 241 մլն 300 հզր դրամ փոխանցել են Մեղրիի մանկապարտեզի հիմնանորոգման, 194 մլն 880 հզր դրամ՝ վիրավոր և հաշմանդամ զինծառայողների վերականգնողական բուժման, 12 մլն դրամ՝ «Քայլ առ քայլ» ծրագրի և 6 մլն 446 հզր դրամ՝ «Առանց պլաստիկի Հայաստան» ծրագրի համար։
Այդ գումարից փետրվարի 15-ի դրությամբ ծախսվել է 236 մլն 578 հզր դրամը, որից հիմնադրամի գործառնական ծախսերը (աշխատավարձեր, գործուղումներ, գնումներ) կազմել են 23 մլն 908 հզր դրամ։ Մնացած գումարն ուղղվել է շահառուներին, այդ թվում՝ 142 մլն 383 հզր դրամ՝ դասական երաժշտության հաստատությունների («Հովեր» երգչախումբ, Ֆիլհարմոնիկ նվագախումբ, Սիմֆոնիկ նվագախումբ, Կամերային երգչախումբ և Կամերային նվագախումբ) և «Երևանյան հեռանկարներ» դասական երաժշտության միջազգային փառատոնի աջակցությանը, 20 միլիոն դրամ՝ Հայրենիքի պաշտպանի վերականգնողական կենտրոնին։ Արտերկրի հեղինակավոր բուհեր ընդունված երիտասարդների ուսման վարձերին ուղղվել է 44 մլն 411 հզր դրամ, այդ նպատակին «Իմ քայլը» հիմնադրամի ջանքերով ևս 240 մլն դրամ ուղղվել է գործընկերների կողմից։
«Իմ քայլը» հիմնադրամը ՀՀ պետական բյուջեից գումար չի ստացել։
Հիմնադրամի հոգաբարձուների խորհրդում են՝
1. Աննա Հակոբյան - Հոգաբարձուների խորհրդի նախագահ
2. Լենա Նազարյան - ՀՀ ԱԺ նախագահի տեղակալ
3. Վահագն Թևոսյան - ՀՀ ԱԺ պատգամավոր
4. Արսինե Խանջյան - դերասանուհի
5. Սերժ Թանկյան - երգիչ-երգահան
6. Սառա Անջարգոլյան - Իմփաքթ Հաբ Երևանի համահիմնադիր և ղեկավար
7. Լուսինե Քասարջյան - «FestivAr» հայկական փառատոնների ասոցիացիայի գործադիր տնօրեն
8. Վահան Վարդապետյան – բժիշկ
Հիմնադրամից լրացուցիչ հայտնել են, որ հիմնադրամը մշակում է տարբեր ոլորտների վերաբերող մի շարք ծրագրեր, որոնց մի մասն արդեն մեկնարկել է, մյուսները ֆոնդահայթայթման կամ հայեցակարգի մշակման փուլում են։
Ընթացիկ ծրագրեր
Հիմնադրամը շարունակելու է արտերկրի բուհեր ընդունված ուսանողներին կրթաթոշակների տրամադրման ծրագիրը՝ նոր հայեցակարգի հիման վրա։ Մասնավորապես, կրթաթոշակներ կտրվեն Հայաստանի զարգացման առաջնահերթություններից բխող մասնագիտություններ ուսանող և տվյալ մասնագիտության գծով առաջնակարգ համալսարան ընդունված երիտասարդներին։
Բնապահպանության ոլորտում հիմնադրամը մասնակցելու է «Առանց պլաստիկի Հայաստան» ծրագրի իրականացմանը՝ գործընկերությամբ ՀՀ Բնապահպանության նախարարության և ՄԱԿ-ի հայաստանյան գրասենյակի։
Ծրագրի նպատակն է նպաստել Հայաստանի շրջակա միջավայրի պահպանությանը՝ պոլիէթիլենային տոպրակների կիրառության նվազեցմանն ուղղված իրազեկման արշավների, խրախուսման մեխանիզմների և սպառողների վարքագծային փոփոխության միջոցով։ Ներկայումս ընթանում են ծրագրի իրականացման համար անհրաժեշտ ֆոնդերի հայթայթման աշխատանքներ։
Սոցիալական ապահովության ոլորտում հիմնադրամը Վորլդ Վիժն Հայաստանի հետ համատեղ մեկնարկել է կարիքավոր ընտանիքներին «Ավարտական մոտեցմամբ» աջակցության ծրագիր։
Ծրագրի նպատակն է նպաստել Հայաստանում աղքատության հաղթահարմանը՝ գնահատելով սոցիալապես խոցելի վիճակում գտնվող ընտանիքների կարիքները, բարելավելով ընտանիքների սոցիալական պայմաններն ու նրանց անդամների կարողությունների հզորացման միջոցով հասցնել նրանց տնտեսական ինքնաբավության։ Այս պահին ծրագրում ընդգրկված են այն 15 ընտանիքները, որոնց ժամանակավոր կացարանով ապահովման հարցն ավելի վաղ լուծեր էի Հիմնադրամը։ Նախատեսվում է շահառու ընտանիքների թիվը հասցնել 25-ի, որոնց «ավարտելուց» հետո ծրագրում կընդգրկվեն նոր ընտանիքներ։
«Քայլ առ քայլ» ծրագիրն իրականացվում է «Կենտրոն» հեռուստաընկերության հետ համատեղ։ Նպատակն է նպաստել բարեկեցիկ և հոգատար հասարակության կառուցմանն ու կամավորության մշակույթի խթանմանը՝ բազմազավակ, կարիքավոր ընտանիքների բնակարանների վերանորոգման միջոցով։ Ծրագիրը նախատեսվում է իրականացնել նվազագույն ֆինանսական ներդրումներով՝ կամավոր անհատների և կազմակերպությունների ջանքերով։
Պլանավորվող ծրագրեր
Հիմնադրամը ծրագրում է զբաղվել մանկալքության կանխարգելման և ընտանիքների հետ երեխաների վերամիավորման, խնամատար ընտանիքների ինստիտուտի կայացման և շուրջօրյա խնամքի հաստատությունների բեռնաթափման ու հասարակությունում դրանց շրջանավարտների ինտեգրման հարցերով։ Այդ նպատակով ներկայումս խորհրդակցություններ են անցկացվում ոլորտի դերակատարների հետ՝ հասկանալու բացերն ու ձևակերպելու ծրագրի ռազմավարությունը։
Հիմնադրամը նախատեսում է նաև իրականացնել Հայաստանում վերարտադրողականության աճին ուղղած ծրագիր, որի էությունն է արտամարմնային բեղմնավորում և ներարգանդային սերմնավորում կատարելու հարցում ֆինանսապես աջակցել անպտուղ կարիքավոր ընտանիքներին։Ներկայումս նման հնարավորության սպասում է 400 ընտանիք, որոնք նախկինում դիմել էին իշխանափոխությունից հետո գործունեությունը դադարեցրած «Արագիլ» հիմնադրամին։
Հիմնադրամի պլաններում է նաև համայնքային զարգացման ծրագիր՝ նպաստելու Հայաստանի գյուղական համայնքներում սոցիալ-տնտեսական իրավիճակի բարելավմանը՝ արժեշղթայի զարգացման մոտեցման և ընտրված համայնքներում փորձացուցադրական գյուղի զարգացման միջոցով։ Ներկայումս մշակվում է ծրագրի հայեցակարգային փաստաթուղթը։