Ներկայիս Թուրքիայի Հանրապետությունը հղի է ներքին բախումներով, հայկական համայնքը կրիտիկական վիճակում է. փորձագետներ
Երբ ինձ հարցնում էին՝ ի՞նչ եք սպասում Թուրքիայի նախագահական և պառլամենտական ընտրություններից, ասում էի՝ կա´մ քաոսային վիճակ, կա´մ էլ հանդարտ: Այսօր լրագրողների հետ հանդիպմանը նման տեսակետ հայտնեց Թուրքիայից հասարակական, քաղաքական գործիչ, լրագրող Րաֆֆի Հերմոն Արաքսը: Նա կարևորեց այն, որ քրդական կուսակցությունը բավականին ձայներ հավաքեց, հակառակ դեպքում՝ Ռեջեփ Թայիփ Էրդողանը ոչ թե կհաղթեր, այլ ջախջախիչ հաղթանակ կտաներ.
«Պառլամենտում 600 աթոռ կա, մեծամասնություն կազմելու համար պետք է որևէ կուսակցություն զբաղեցնի 300 աթոռ: Սակայն Էրդողանի կուսակցությունը, օգտագործելով պետության բոլոր լծակները, այդպես էլ չկարողացավ բացարձակ մեծամասնություն կազմել խորհրդարանում»,- նշեց Րաֆֆի Հերմոն:
Սակայն նա նկատեց, որ Ռեջեփ Թայիփ Էրդողանը հետաքրքիր գործեց նախագահական ընտրությունների ժամանակ: Նրա կարծիքով՝ Էրդողանը հստակ հասկացավ, որ 2-րդ փուլով ընտրություններ չպետք է լինեն:
«Առաջին անգամ ընտրություններն անցկացվում էին 2 փուլով և Էրդողանը պետք է ամեն ինչ աներ, որ ընտրությունները 2-րդ փուլ չանցնեին, քանի որ բոլոր ուժերը կմիավորվեին իր դեմ, իսկ Էրդողանը սա հասկացավ, որ կարող է կորցնել հանրապետության նախագահի պաշտոնը: Այսպիսով՝ մեծամասնություն չկազմելով խորհրդարանում, նա կարողացավ նախագահական ընտրություններում հաղթանակի հասնել՝ 52.6 տոկոսով»:
Րաֆֆի Հերմանի գնահատմամբ՝ ներկայիս Թուրքիայի հանրապետությունը հղի է ներքին բախումներով և ներքաղաքական զարգացումներ են սպասվում. «Չեմ կարող ասել, որ ներքին պատերազմ կլինի, բայց երկրի տնտեսական վիճակը շատ վատ է»,-շարունակեց նա:
Ինչ վերաբերում է Պոլսո Հայոց պատրիարքի փոխանորդի պաշտոնը ստանձնած Արամ արքեպիսկոպոս Աթեշյանի՝ Էրդողանին ուղղված շնորհավորանքին, Հերմանն ասաց, թե իր համար շնորհավորանքի տեքստի մեջ որևէ զարմանալի բան չկար: Նրա խոսքով՝ Աթեշյանը կտապալվի այն ժամանակ, երբ Էրդողանի իշխանությունը տապալվի, քանի որ հայկական համայնքն այն իրավիճակում չէ, որ կարողանա ինչ-որ բան անել:
Պոլսահայ Տիրան Լոքմագյոզյանն էլ, համաձայնելով Րաֆֆի Հերմանի հետ, հայտարարեց, որ իր համար Թուրքիայում կայացած ընտրությունները 100 տոկոս կանխատեսելի էին. «Իհարկե Էրդողանը պետք է շահեր, իսկ քրդամետ կուսակցությունը միշտ 10 տոկոս ունի և շարունակում է ունենալ, սակայն այս անգամ հազիվ անցան այդ շեմը»,- նշեց Լոքմագյոզյանը:
Ինչ վերաբերում է հայկական համայնքին՝ Տիրան Լոքմագյոզյանն ասաց, որ հայ համայնքը պառակտված է, այդ թվում՝ նաև քաղաքականապես:
«Խառնամուսնությունները մեծ չափերի են հասնում՝ 50 տոկոսն անցել է: Ժամանակին, եթե հայ ընտանիքը չուներ հայր, մայր, ապա իրավունք չուներ հայկական դպրոցում սովորելու, հիմա այդ արգելքն էլ հանվել է: Այժմ հայկական դպրոցները շատ քիչ աշակերտներ ունեն, որոշները փակվել են, որոշներն էլ փակվելու կամ միավորվելու վտանգի տակ են, դպրոցների աշակերտների զգալի տոկոսը խառնամուսնությունների արդյունք են, այսինքն՝ ծնողներից մեկը հայ չէ»: