Սպորտի նախարարը դրամական պարգևներ է հանձնել մրցանակակիր դարձած ուժային եռամարտիկներին ու բազկամարտիկներին
ՀՀ սպորտի և երիտասարդության հարցերի նախարար Լևոն Վահրադյանը ֆեյսբուքյան իր էջում գրառում է կատարել՝ տեղեկացնելով, որ մրցանակներ է հանձնել հանձնեցի պատանիների, երիտասարդների և մեծահասակների աշխարհի և Եվրոպայի առաջնությունների մրցանակակիր դարձած ուժային եռամարտիկներին և բազկամարտիկներին:
Գրառումն ամբողջությամբ ներկայացնում ենք ստորև.
«ՀԱՕԿ-ի նախագահ Գագիկ Ծառուկյանի կողմից սահմանված դրամական պարգևները հանդիսավոր պայմաններում հանձնեցի պատանիների, երիտասարդների և մեծահասակների աշխարհի և Եվրոպայի առաջնությունների մրցանակակիր դարձած ուժային եռամարտիկներին և բազկամարտիկներին:
Միջոցառմանը ներկա ՀԱՕԿ-ի նախագահը և ես համակարծիք էինք, որ, ի թիվս օլիմպիական և հատկապես մեր երկրի համար հենակետային համարվող մարզաձևերի, Հայաստանում զարգացում են ապրում նաև ոչ օլիմպիական մարզաձևերը, և դրանց նկատմամբ ցուցաբերվող պատշաճ ուշադրությունն այսօր հնարավորություն է տալիս խոսելու միջազգային մրցահարթակներում հայ մարզիկների հաջող մրցելույթների և նվաճած բազմաթիվ մեդալների մասին:
ՀԱՕԿ-ի նախագահի կողմից սահմանված դրամական մրցանակներ հանձնեցի նաև բազկամարտի հաշմանդամների Եվրոպայի առաջնությունում մրցանակային տեղեր զբաղեցրած մարզիկներին»: