ТIемалойн хилла командир Хангошвили вийнарг маьршаваккхийта Америке аьлла тIедиллина Путина - WSJ
Американ Цхьаьнатоьхна Штаташ а, Оьрсийчоь а дийцарш деш йу тутмакхаш дIасахийцарх: уггар а хьалха, Wall Street Journal гIирсан материалехь йаздарехь, Москва къар ца ло Красиков Вадим араваккха бохуш, хетарехь Оьрсийчоьнан къайлахчу сервисийн белхахо ву иза. Германихь кхел йина цунна нохчийн тIемалойн хилла командир Хангошвили Зеламха верна.
Дийцаршкахь, газето йаздарехь, Оьрсийчохь шпионажалла лелийна аьлла, кхел йинчу США-н вахархочун Уилан Полан а, оццу бехкана лаьцна Москвара СИЗОхь летточу Wall Street Journal ресурсан журналистан Гершкович Эванан а цIераш йу йохурш.
Артиклехь бахарехь, Путин Владимира тIедожийна Красиков Вадим арахецийта аьлла. И хаттар дийцаредеш ву кхерамзаллин Кхеташонан секретарь Патрушев Николай. Америкера набахтехь латтош хилла, Оьрсийчохь таIзар динчу баскетболан ловзархочух Грайнер Бриттница хийцира Бут Виктор. Ткъа Красиков америкахойн юрисдикцица вац, иза Германихь чохь латтош ву. Цо мел а чолхе доккху гIуллакх дийцаршкахь.
ДIасахийцаран мел а чолхе схема хила а тарло, цигахь тептара йукъахь хир бу политикан тумакхаш лерина Оьрсийчоьнан оппозиционераш, Навальный Алексей, масала, хаамбо журналисташа, цхьа могIа Малхбузенан пачхьалкхийн анониман хьаькамашна тIетевжина.
Товбеца-беттахь The New York Times газето хаамбина, Американ Цхьаьнатоьхначу Штаташа а, Оьрсийчоьно а дийцарш долийна тутмакхаш дIасахийцарх, Гершкович а ву цу йукъахь аьлла. И бакъдира Американ президенто Джо Байдена а. Оьрсийн оппозиционерашца хийца билгалбаьхначу оцу тептарехь США-н бахархой хилла ца Iа аьлла дуьххьара хаамбо The Wall Street Journal газето. Публикацих лаьцна цкъачунна Москвано комментарий йина йац.
Соколов Вадиман цIарца долчу кехаташца леллачу Красиковна кхел йира Берлинехь 2021-чу шеран гIуран-баттахь. Кхелана къаьстира, Москван тIедахкаршца иза лелаш хиллийла, 2019-чу шарахь Берлинехь Хангошвили вер пачхьалкхан терроризман акт лерира кхелахоша. Журналистийн талламашца а догIуш, Красиков хила тарло ФСБ-н лаккхара эпсар а, "Вымпел" спецназан лерринчу декъан ветеран а. Хангошивли верна бехкехилар Москвано тIе ца лоцу.