"Даймахкана гIуллакхаш дарна" совгIат дина Кадыровн йоккхаха йолчу йоIана

Республикехь культурин министр йолчу, Нохчийчоьнан куьйгалхочун йоIана Кадырова Iайшатана "Даймахкана гIуллакхаш дарна" аьлла орденан мидал йелла – оцу омрана куьгйаздина Оьрсийчоьнан президенто Путин Владимира.

ХIун динчунна дина совгIат, хоуьйтуш дац – омри тIехь билгалдаьккхина ду "даймехкан культура а, исбаьхьалла а кхиорна а, дуккха а шерашкахь беркате къахьегарна" а аьллла, совгIат дечу массарна а йаздийриг ду и.

Цул совнах, Дагестанера министрийн кабинетан куьйгалхочунна ДоттагIаллин орден йелла "балхаца кхиамаш бахарна а, дуккха а шерашкахь хьанал къахьегарна а", ткъа куйгалхочун администрацин урхалхочунна Таймасханов ГIаласна – "Даймахкана хьалха декхарш кхочушдарна а, дуккха а шерашкахь хьанал къахьегарна а" аьлла, IV-чу бараман орден йелла.

Iайшат – Кадыров Рамзанан йоккхаха йолу йоI йу. Шен 17 шо долчу хенахь Firdaws модан цIийнан директор хилира цунах, 2009-чу шарахь цуьнан нанас Кадырова Меднис схьадиллина дара и цIа. 2020-чу шарахь цкъа хьалха регионера культурин министран хьалхара гIовс хIоттийра иза, ткъа 2021-чу шарахь, шен 22  шо долчу заманчохь, министр йира цунах. Iайшатан хIусамда Мацуев Висхан кху шеран товбеца-баттахь республикин вице-премьер а, йуьртабахаман министр а хIоттийра.

Кадырова Iайшат "культурин хьакъйолу белхахо" йу, иштта мидалш йу цуьнан "Адамийн бакъонаш Iалашйарна" а, "Нохчийчоьнна хьалха декхарш кхочушдарна", регион "кхиорехь дакъа лацарна" а совгIат дира мехкан 100 шо кхочуш, ДоттагIаллин орден йелира "ДНР" аьлла дIакхайкхийначу мехкан цIарах, иштта Нохчийчоьнан лаккхара совгIат а – Кадыровн орден.

Американ Цхьаьнатоьхначу Штатийн а, Евробертан а, Японин а санкцийн тептаршкахь йу Кадырова Iайшат. Цул совнах Американ санкцешна йукъатоьхна Кадырова Iайшатан Firdaws модин цIа а.

ТIаьххьарчу беттанашкахь федералан пачхьалкхан совгIаташ делла Кадыровн кхечу гергарчарна а тIаьхьа. Марсхьокху-баттахь Нохчийчоьнан вице-премьерна, мехкан урхалхочун невцана Тумхаджиев Iийсанна IV-чу бараман орден йелира "Даймахкана гIуллакхаш дарна" аьлла. Иштта марсхьокху-баттахь Путин Владимира шен куьйга совгIат дира Кадыровн нанна – Айманина – Сийлаллин орденца. Товбеца-баттахь 26 шо долчу Кадыров Рамзанан вешин кIантана, иштта республикехь вице-премьеран а, бахаман, латтанийн йукъаметтигийн министран даржехь волчу Кадыров Хьамзатана "Даймахкана гIуллакхаш дарна" аьлла, II-чу барамехь мидалан орден йелира. Стигалкъекъа-баттахь "Нана-турпалхо" седа белира Кадырова Меднина – политикан хIусамнанна.

Нохчийчохь иттаннашкахь мехкан урхалхочун гергарнаш хIиттабо регионехь куьйгаллин лаккхарчу даржашка. Шен цIийнах болу нах хьалхатеттарехь, къийса хIума ца го цунна шена. "Сайн тешам берриг хIоттаво", - элира Кадыровс.

Пачхьалкхан даржашкахь ду цуьнан бераш, йижарий, невцарий, йиша-вешин доьзалхой, шичой, маьхчой. Кавказ.Реалиин редакцино вовшахтуьйхира республикан пачхьалкхан структурашкахь белхаш бечу КадыровгIеран цIийнах болчех дуьззина тептар. 20I8-чу шарахь Оьрсийн "Би-би-си" телеканалан лараршца, Нохчийчуьра 158 баккхийчу хьаькамашлахь 30 процент Кадыров Рамзанан гергарнаш бу. 2021-чу шарахь Кадыровн йоI Iайшат, оцу заманчохь 22 шо дара цуьнан, Нохчийчоьнан культурин министр хIоттийра.