Бехкбоцуш лаьцначу шайн кIантана орца доьху ХасаевгIара
"Сан ян чIагIо ю, Уралехь шен дахарехь цкъа а Мовсар хилла цахиларх. ШолгIа делахь, иза заьIапхо ву. Кхиазхо волчу заманчохь хенан даьIахк каг а елла, цул тIаьхьа даьIахкаш нийса ца хиттаелла цуьнан. Оцу бахьанашца, букъсурт сеттина ву иза, ишта цхьа ког вукхул а ялх сантиметар боца бисина сан вешин. Тешаша даредарца, киллер тIе а ведда, цунна тапча а тоьхна, ведда. Ткъа водийла дуй цу кепара стаг? Цул совнах, и лазор бахьанехь Паркинсонан цамгар а гучуяьлла цуьнгахь, куьйгаш эгадо Мовсаран. Хьан лоцур ву стаг вен и санна волу инвалид?", - дийцина "URA.RU" хьосте лаьцначу Хасаев Мовсаран вашас Шемала.
Цул совнах, Шемала тIечIагIдарца, цу деношкахь цуьнан ваша цIахь хиларна бIе гергга теш ву. ЦIахь, арахь, балхахь, тезетахь а иза гина нах бу. Шен ваша бехкевеш, Екатеринбургера хаам хилча, иза лоцуш чоьхьарчу гIуллакхийн министран гIовс Алаудинов Апти вара боху Хасаев Шемала.
"ХIетахь цунна ца хаьара ма-дарра, кху деношкахь Екатеринбургехь хилла иза, шен коллегашца дийцарш а хилла цуьнан", - дуьйцу Хасаевс.
"URA.RU" хьостано яздарца, 2011-чу шеран бIаьста Екатеринбургехь Белинскийн урамехь герз тоьхна вийра криминалан гонашкахь вевзаш волу Арутюнян Ашот.
И зулам къастоза дуьсу дуккха а шераш дара, стохка аьтто хилла полисхойн киллер мила ву хаа.
Кху шеран Дечкен-баттахь Устрада-гIала а баьхкина, меттигерчу ОБОП-н белхахошца цхьана лаьцна, дIавигина Хасаев Мовсар.
Хасаевна тIехIоьттина Нохчийчоьнан омбудсмен Нухажиев Нурди.
Хасаев Мовсаран адвокат хила ша реза хилар дIахаийтина журналисто, адвокато Гериханов Хожас Фейсбукерчу шен агIон тIехь.