ЗША абвясьцілі пра новы пакет вайсковай дапамогі Ўкраіне на $325 мільёнаў
У пакет увойдуць боепрыпасы для РСЗА HIMARS, супрацьтанкавыя сыстэмы, артылерыйскія снарады, супрацьтанкавыя міны, высокадакладныя авіяцыйныя боепрыпасы, ракеты з аптычным навядзеньнем, абсталяваньне для бясьпекі партоў, запчасткі і палявое абсталяваньне.
«Злучаныя Штаты будуць працягваць працаваць са сваімі саюзьнікамі і партнэрамі, каб забясьпечыць Украіну магчымасьцямі для задавальненьня яе непасрэдных патрэб на полі бою і доўгатэрміновых патрэб у галіне бясьпекі», — гаворыцца ў паведамленьні.
На пачатку красавіка ЗША паведамілі аб выдзяленьні Ўкраіне вайсковай дапамогі на 2,6 млрд даляраў. У той пакет увайшлі, сярод іншага, боепрыпасы для сыстэм HIMARS і СПА Patriot, артылерыйскія снарады, 400 гранатамётаў, 10 грузавікоў і 10 прычэпаў для перавозкі цяжкага абсталяваньня, аўтацыстэрны для паліва, стралковая зброя, транспартныя сродкі і тэхнічнае абслугоўваньне на 500 млн даляраў.
Украінскія ўлады з канца мінулага году кажуць аб падрыхтоўцы да контранаступу. Для гэтага Кіеў запрошваў у Захаду сучаснае ўзбраеньне. І ў апошнія месяцы заходнія краіны абвясьцілі аб перадачы Ўкраіне сучасных танкаў і баявых машын пяхоты, а таксама аб першых з пачатку вайны пастаўках зьнішчальнікаў МіГ-29.