Не губляйма веры
Першы нядзельны навагодні шпацыр, о пардон, лепей сказаць і напісаць згодна з праўдай… веснавы шпацыр праходзіў у прамянях сонца і пры тэмпературы плюс пятнаццаць градусаў у Беластоку. Аказваецца, што 1 студзеня ў Варшаве на Акенці быў пабіты рэкорд студзеня ў Польшчы з часоў вядзення метэаралагічных назіранняў. На тэрмометрах яшчэ перад поўднем віднела там проста плюс 18,9 градуса па Цэльсію. А а гадзіне трэцяй ночы ў Глухалазах зафіксавана ажно 18,7 крэсак вышэй нуля — падае польскі Інстытут метэаралогіі і воднай гаспадаркі. Неверагодна высокая тэмпература, калі глянуць на картку календара зімовай парой года. Са свайго пражытага ведаю, што нават некаторыя велікодныя святы бываюць значна больш сцюдзёнымі і ў дадатак снежнымі. Адным словам, для аматараў шпацыраў пасля сільвестравых застолляў лепшага надвор’я не прыдумаць. Не забывайма і пра аматараў ровараў, якія са сваёй заўзятасцю ляцелі па веладарожках, найчасцей з хуткасцю, як мовіцца, «колькі Бозя дала сіл у ногі і педалі». І несліся так, быццам у першы дзень новага года хацелі ўстанавіць свае рэкорды хуткасці. Зразумела, што і аматары выгульвання сабак мелі свае хвіліны шчасця і спакою пасля начной грукатні феерверкаў, якія, аказваецца, не толькі сабак, але і большасць жывёл прыводзяць у павышаны стан стрэсу і разладжвання ўнутраных сістэм навігацыі ў птушак. Многія самаўрады ў Польшчы адмаўляюцца ад феерверкаў, а за зэканомленыя грошы дапамагаюць бяздомным ці акалечаным жывёлам. Але пішучы гэтыя словы ў нядзельны вечар, чую як над Беластокам праносяцца надалей гукі петарднай стральбы.
На Украіне, на жаль, вядзецца рэальная стральба і ў першы дзень новага 2023 года гінуць вайскоўцы і мірныя людзі. Рэальная вайна кранае і ўсю Беларусь. Нічога затым дзіўнага, што навагоднія звароты лідараў беларускай нацыі набіраюць такой глыбіні занепакоенасці і адначасна веры ў беларускую перамогу. Святлана Ціханоўская, Зянон Пазьняк ці Івонка Сурвілла звярнуліся да суродзічаў са сваімі прамовамі.
Менавіта зварот старшыні Рады Беларускай Народнай Рэспублікі Івонкі Сурвіллы прапануем нашым чытачам: «Дарагія мае суродзічы-беларусы, чым цяжэйшае нашае жыцьцё, тым лягчэй пераадольваюць бяду тыя з нас, хто верыць у будучыню. Шмат дзесяцігодзьдзяў беларусы, раскіданыя пасьля Другой сусьветнай вайны па сьвеце, верылі, што дачакаюцца таго дня, калі вернуцца ў свой родны край. На кожным сьвяткаваньні Дня Волі ці Дня Герояў прыпаміналі, што не было тае імпэрыі, якая з часам не развалілася. Разваліцца і гэтая, і тады адродзіцца наш вольны незалежны край.
І яны дачакаліся. Хаця воля нашая доўга не пратрывала, усё ж мы памятаем той слаўны дзень 25 жніўня 1991 году, калі наш край зноў абвясьціў сябе вольнай і незалежнай дзяржавай.
На жаль, мы не былі яшчэ гатовыя, каб абараніць гэтую волю і незалежнасьць. Вораг зноў адабраў іх у нас. Але мы дасюль верым, што і цяперашняя няволя ня будзе вечнай. Як кажа наш нобэлеўскі ляўрэат Алесь Бяляцкі, „я веру, бо ведаю, што пасьля зімы прыйдзе вясна”.
Мае дарагія суродзічы, разваліцца й гэтая імпэрыя зла, і мы будзем зноў „людзьмі звацца”. Я моцна веру ў гэта, бо я дакладна гэта ведаю. І гэтым разам мы будзем гатовыя бараніць сваю дзяржаву. Гора нас навучыла цаніць вялікую каштоўнасьць, якой ёсьць воля.
Дык з глыбіні сэрца жадаю ўсім вам: не губляйце веры! Бо на нашым баку Божая воля і нашая бясконцая любоў да свайго краю. З Новым годам, мае дарагія суродзічы! Жыве Беларусь, і будзе жыць!».
Таму і мы давайце не будзем губляць веры і адначасна надзеі на лепшае беларускае. Таксама і ў нас, на Беласточчыне! Няхай і святы Ражджаства Хрыстовага даюць нам не толькі сямейнае цяпло і дабрыню, але нясуць перамогу дабра над злом украінскаму і беларускаму народам!
Яўген ВАПА, тыднёвік „Ніва”, №2, 2023 год
Artykuł Не губляйма веры pochodzi z serwisu БЕЛАРУСКАЕ РАДЫЁ РАЦЫЯ.