За нібыта напад на амапаўцаў Уладзімір Жыхар прыгавораны да пяці гадоў
Як паведамляюць праваабаронцы, Жыхара абвінавацілі па трох артыкулах Крымінальнага кодэкса.
Суд Савецкага раёна Менска 30 красавіка прыгаварыў да пяці гадоў пазбаўлення волі Уладзіміра Жыхара, які мінулым летам падчас маршу ў мікрараён Дразды быццам бы выхапіў у супрацоўніка міліцыі траўматычны пісталет „Аса” і збіў некалькіх амапаўцаў.
Пацярпелыя амапаўцы ў судзе.
Як паведамляюць праваабаронцы, Жыхара абвінавацілі па трох артыкулах Крымінальнага кодэкса: ч. 1 арт. 342 (арганізацыя альбо актыўны ўдзел у групавых дзеяннях, якія груба парушаюць грамадскі парадак), арт. 364 (гвалт альбо пагроза ўжывання гвалту ў дачыненні да супрацоўніка органаў унутраных спраў) і ч. 2 арт. 206 (грабеж, злучаны з гвалтам, альбо з пагрозай прымянення такога гвалту).
Суддзя Аляксандр Якунчыхін прызнаў мужчыну вінаватым і паводле арт. 342 прыгаварыў яго да трох гадоў абмежавання волі ў папраўчай установе адкрытага тыпу, паводле арт. 364 КК — да чатырох гадоў пазбаўлення волі ў калоніі агульнага рэжыму, паводле арт. 206 КК — да двух гадоў калоніі агульнага рэжыму. Канчатковы вердыкт — пяць гадоў пазбаўлення волі ў калоніі агульнага рэжыму. Такое пакаранне і запытвала пракурор Анастасія Маліка.
Па справе праходзілі пацярпелымі восем амапаўцаў. У якасці кампенсацыі маральнай шкоды Жыхар павінен выплаціць шасці з іх па 1 тыс. рублёў, аднаму — 3 тыс.
Згодна з матэрыяламі следства, 13 верасня 2020 года Жыхар з групай асоб парушаў працу транспарту, перашкаджаў працаваць цырульні „Кот Матроскін”, краме „Фікс-Прайс”, аптэцы. У гэты дзень у Менску праходзіў Марш герояў.
„Па дарозе да мікрараёна Дразды па Ціхім завулку каля дома 6, маючы намер ужыць гвалт да супрацоўніка АМАПа Грыбоўскага, схапіў яго і паспрабаваў выцягнуць з аўтамабіля. Пагражаў ужываннем гвалту камандзіру Бураку, Дзямідаву, Кісялёву, Крукаву з мэтай перашкодзіць выкананню іх абавязкаў. Спрабаваў таксама выхапіць траўматычны пісталет”, — было заяўлена ў судзе.
Прадстаўнік прадпрыемства „Менсктранс” выставіў Жыхару матэрыяльны ўрон з-за перабояў у працы грамадскага транспарту ў памеры 30.001 рубель 82 капейкі. Суд прызнаў права спагнання матэрыяльнай шкоды з абвінавачанага ў грамадзянскім працэсе.
Абарона абвінавачанага заявіла, што падабаронны ішоў па пешаходнай частцы вуліцы і не мог перашкаджаць руху транспарту. Адвакат настойваў, што пісталет у амапаўца Леснікова забіраў зусім іншы чалавек, а на відэазапісе прэс-цэнтра МУС відаць, што Жыхара збіваюць два чалавекі, хоць прызнаецца ў гэтым збіцці толькі Крукаў. Жыхар напісаў заяву ў РУУС па факце збіцця, аднак яе не прынялі.
У апошнім слове 28 красавіка Жыхар адзначыў: „Я не ведаю, што сказаць у гэтай сітуацыі, у гэтай краіне, дзе выбарчыя правы мае не ўлічваюцца, дзе можна вось так выварочваць усё што заўгодна, дзе грамадзянскія правы, дадзеныя нам Канстытуцыяй, а менавіта выйсці і адкрыта выказаць сваё меркаванне, парушаныя. У нас адабралі права абараняць сваё жыццё. Хочацца верыць, што калі-небудзь краіна стане вольнай і наш народ будзе жыць на сваёй зямлі”.