У Гомелі звольнілі настаўніцу з-за пагрозы ўдарыць партай
З сярэдняй школы № 15 горада Гомеля 13 верасня звольненая настаўніца малодшых класаў, якая нецэнзурнай лаянкай абражала вучня 4-га класа і пагражала ударыць яго партай. Пра рашэнне звольніць настаўніцу паведаміў журналістам вечарам 13 верасня начальнік Гомельскага абласнога ўпраўлення адукацыі Сяргей Парошын.
Скандал у гомельскай школе пачаўся пасля таго, як сайт „Сильные новости” апублікаваў відэа, на якім настаўніца пагражае школьніку: трымае ў руках парту і кажа: „Я пайду ў турму, але табе (…) будзе”. Пасля публікацыі відэа ў школе прайшоў бацькоўскі сход. Бацькам чацвёртакласніка выказалі прабачэнні — як і іншым бацькам. Настаўніца прапрацавала ў школе 35 гадоў, не мела спагнанняў. У гэтым годзе яна вяла 2-гі клас, у 4-м была на замене.
„Факты, выкладзеныя ў відэа, знайшлі сваё пацвярджэнне. Настаўніца пісала тлумачальную дырэктару, яна ўсведамляе свае дзеянні як няправільныя. Мы шкадуем, што так атрымалася. Я прашу і педагогаў, і бацькоў аб тым, каб паміж імі не было падзелу. Усе павінны быць адзіныя, мець адзіныя погляды на патрабаванні, этычныя нормы, каб адзінства прыносіла станоўчыя моманты. Дзяцей трэба выхоўваць так, каб не ўзнікалі такія выпадкі, каб дзеці паводзілі сябе годна — у школе, на вуліцы. Многія бацькі шкадуюць, хочуць, каб настаўніца засталася ў школе. Да яе была чарга ў першы клас — людзі ішлі на яе імя, вопыт, вынікі. Ну а тое, што атрымалася, — ну якія могуць быць апраўданні? Грамадскасць убачыла дзеянні настаўніцы, якія не сумяшчальныя з яе працай, этычнымі нормамі”, — патлумачыў журналістам Парошын.
Разам з тым бацькі другакласнікаў шкадавалі, што настаўніцу звольнілі. У гутарцы з журналістамі яны выказваліся, што аўтарытэт настаўніка „зведзены да нуля” і ва ўсім вінаватыя бацькі, якія дрэнна выхоўваюць сваіх дзяцей. На іх думку, чацвёртакласнік справакаваў настаўніцу.
Бацькі вучняў 4-га класа, у якім адбыўся інцыдэнт, не маюць адназначнага меркавання на гэты конт: некаторыя выказаліся за звальненне настаўніцы, хтосьці — супраць.