Барыс Жаліба: Грошы Расея будзе даваць ў абмен на інтэграцыю
Эканаміст Барыс Жаліба патлумачыў, чаму беларускія ўлады просяць грошы ў Кітая.
Як паведаміў міністр фінансаў Беларусі Максім Ермаловіч, Беларусь плануе ў гэтым годзе атрымаць кітайскі крэдыт на 3,5 мільярда юаняў (каля 500 мільёнаў даляраў). Суадносны мемарандум ужо падпісаны.
Барыс Жаліба: Як я зразумеў, гэтым разам наша Міністэрства фінансаў просіць у Кітая не звязаны крэдыт (а менавіта такое крэдытаванне і прадастаўляе Кітай апошнім часам), а, як кажуць, наяўнымі грашыма. У выглядзе выключэння.
РР: Складаная фінансавая сітуацыя?
Барыс Жаліба: Расея спачатку абяцала кампенсаваць падаткавы манеўр, але затым адмовілася гэта рабіць. Маўляў, спачатку давайце рухаць інтэграцыйныя працэсы, а ўжо затым атрымаеце пернік. Тое, што пад выглядам інтэграцыі Масква хоча цалкам прывязаць да сябе, а затым і паглынуць Беларусь, зразумела многім, таму беларускія ўлады зараз круцяцца, як вуж на патэльні.
РР: Здаецца, Расея абяцала міждзяржаўны крэдыт на 600 мільёнаў даляраў…
Барыс Жаліба: Так, пра гэта казаў міністр фінансаў Расеі Антон Сілуанаў, які адначасова з’яўляецца віцэ-прэм’ерам. Але затым гэтую заяву дэзавуявалі, а крэдыт таксама прывязалі да інтэграцыі. Маўляў, раніцай – крэслы, вечрам – грошы.
Таму сёння міністру фінансаў Беларусі нічога іншага не застаецца, як шукаць грошы з іншых крыніц. Вось і звярнуліся да Кітая, бо, хутчэй за ўсё, у гэтым годзе краіна нічога не атрымае ад Расеі. Грошы яна будзе даваць у абмен на інтэграцыю.
Трэба яшчэ нагадаць, што апошні крэдыт Еўразійскага банка (каля 200 мільёнаў даляраў) таксама пакуль знаходзіцца ў падвешаным стане. Калі не будзе крэдытаў, краіна апынецца ў вельмі складаным фінансавым становішчы, якое нават пагражае дэфолтам. Таму тэрмінова і шукаюць грошы.
Кастусь Заблоцкі, Беларускае Радыё Рацыя