Harvey Weinstein artıq ekranda da yad edilir

Cinsi təcavüzdə ittiham olunan kino maqnatının hərəkətlərindən söz açan iki layihə sentyabrın ilk günlərində ekranlara çıxıb. Başqa filmlərin üzərində iş gedir.

Son iki ildə Harvey Weinstein çoxsaylı cinsi təcavüz ittihamları üzündən həm karyerasını, həm də nüfuzunu itirib.

O bu ittihamları dəfələrlə rədd etsə də, ona qarşı çox sayda məhkəmə işləri açılıb.

Weinstein Company şirkətinin keçmiş rəhbəri hazırda Nyu Yorkda baş tutacaq məhkəməsini gözləyir. O, ittihamları qəbul etmir.

Ötən həftəsonu ekranlara çıxmış iki film Weinstein-ə qarşı ittihamlardan söz açır.

“Assistant” (The Assistant) adlı ilk filmin ssenari müəllifi və rejissoru Kitty Green-dir. Dram “Ozark” filminin ulduzu Julia Garner-in oynadığı assistentin ətrafında cərəyan edir. O, həyasız, aqressiv film maqnatı ilə işləyir.

 

Qorxunc kino maqnatı

Filmin dünya premyerası Telluride Kino Festivalında baş tutub. Green əvvəlcə tamamilə fərqli bir film çəkmək istəyirmiş. Ancaq Weinstein məsələsi ortaya çıxanda o, diqqətini bu məsələyə yönəltmək qərarına gəlib:

“Mənə elə gəldi ki, onunla işləyən adamlarla və kino industriyasında pis davranışla üzləşmiş insanlarla yaxın bağlarım var. Mən dərhal diqqətimi Hollivuda və kino sənayesinə yönəltdim və hər şey belə başladı”.

Green altı ay ərzində kino sənayesində çalışan insanlarla söhbət edib. Onların arasında Weinstein Company və Miramax-da işləyən adamlar da olub. Ancaq o həm də əlavə edib ki, bu film birmənalı “The Weinstein Company” haqda deyil, çünki cinsi qısnama bir qurumla məhdudlaşmır.

 

Deadline saytı yazır ki, Garner-in qəhrəmanının bossu olan qorxunc kino maqnatı filmdə gözə dəymir. Onun adı da çəkilmir. Ancaq bir səhnədə o, telefonda Garner-i təhqir edir.

Filmin ilkin ssenarisində bu müəmmalı boss bundan da az görünür: “Hər şey bu yırtıcının ətrafında qurulmuş sistem və mədəniyyət haqda idi. Ancaq yavaş-yavaş anlayırsan ki, bunu təsvir etmək üçün gərək necəsə onun gücünü də göstərəsən. Əmin olmalısan ki, auditoriya buna kimin rəhbərlik etdiyini anlasın”, – Green deyir.

Hələlik, Telluride payızda keçirilən festivallar arasında bu filmi nümayiş etdirən ilk tədbirdir. Ancaq filmin bu mövsümdə özünə necə yol açacağını və kino sənayesinin onu necə qarşılayacağını görmək maraqlı olardı. “The Assistant” Weinstein qalmaqalından bəri bu qəbildən olan, festivala çıxarılmış ilk filmdir.

 

“Toxunulmaz”

Ursula Macfarlane-in çəkdiyi “Toxunulmaz” (Untouchable) adlı ikinci filminin premyerası isə sentyabrın 2-si Huluda olub.

Bu sənədli film debütünü ilin əvvəlində Sundance kinofestivalında edib. Filmə verilən rəylər qarışıqdır.

Film Weinstein-ın yüksəlişi və çöküşü haqdadır. Macfarlane filmə geniş bir şəbəkəni cəlb edib. Filmdə xeyli insan öz hekayəsini danışır. Miramax və TWC-in keçmiş işçiləri Weinsteinın Oskara layiq görülmüş müstəqil kino maqnatı reputasiyası ilə paralel işdəki dominant davranışından danışıblar.

Macfarlane Weinstein-ı suçlayan aktrisalar Rosanna Arquette və Paz de la Huerta da daxil olmaqla bir neçə qadınla da danışıb.

Weinstein-ın sözçüsü “Vanity Fair” jurnalına “Untouchable” filminin tamamlanmasından əvvəl Macfarlane-lə əlaqəyə girməyə cəhd etdiklərini və hələ də “danışığa açıq olduqlarını” bildirib.

"Birtərəfli əsassız ittihamlar hələlik, xəbərlərdə və bu sənədli filmdə verilən yeganə mövzudur”, - açıqlamada daha sonra deyilir.

2018-ci ildə Brian De Palma da bu qalmaqalın təsiri ilə “Predator” (Yırtıcı) adlı qorxu filmi çəkməyə başladığını demişdi.