Қазақстанда тағы жеті жаңа стадион салынады
Қазақстанның Туризм және спорт министрлігі елде жеті жаңа футбол аренасы салынып жатқанын мәлімдеді. Ең үлкен стадиондар Алматы мен Ақтөбеде бой көтереді, деп хабарлайды Tengri Sport.
Қазақстан Туризм және спорт министрлігінің сұрау салуға берген жауабына сәйкес, бүгінде Алматы, Ақтөбе, Семей, Атырау, Ақтау, Көкшетау және Қарағанды қалаларында құрылыс-монтаждау жұмыстары жүргізіліп жатыр, ал ел бойынша барлығы 30 футбол стадионы бар.
Айта кетейік, 2025 жылдың маусымында Туризм және спорт министрлігі осыған ұқсас сауалға берген жауабында Атырауда 12 мың орындық, Ақтауда 10 мың орындық, ал Семейде (Абай облысы) 12,5 мың орындық стадион салу жоспарланғанын хабарлаған болатын.
Бұл ретте ареналардың пайдалануға берілу мерзімі мен құны әзірге белгісіз.
Ашық дереккөздерге сүйенсек, жоспарланған ареналардың ең ірілері Ақтөбе мен Алматыда болады деп күтіледі. Алматыдағы нысанның сыйымдылығы 45 мың орынға, ал Ақтөбеде 34 мың 980 орынға есептелген.
Алматыдағы жаңа стадион қандай болады?
"Қазіргі уақытта жалпы ауданы 36 гектар болатын бөлінген жер телімінде аталған нысан бойынша құрылыс жұмыстары жүргізіліп жатыр. Жаңа стадион УЕФА-ның IV санатындағы талаптарға сай болады. Жоба аясында табиғи шөппен жабылған футбол алаңы, сондай-ақ көрермендерге ыңғайлы болу үшін 1000-нан астам автокөлікке арналған тұрақ қарастырылған. Жобалау-сметалық құжаттама халықаралық стандарттар мен Қазақстан Республикасының қолданыстағы құрылыс нормалары мен ережелеріне сәйкес әзірленіп жатыр. Құрылыс құны мен құрылыс-монтаждау жұмыстарының аяқталу мерзімі мемлекеттік сараптамадан өткеннен кейін анықталады", - деп хабарлады Алматы қаласының спорт басқармасы.
Жаңа аренаның құрылысы басталып кеткенін айта кеткен жөн. Бұл туралы 2026 жылдың тамызында Алматы қаласы құрылыс басқармасының жобалау бөлімінің басшысы Сырым Тұрлыби мәлімдеген болатын.
Алдын ала эскиз, түзетулер болуы мүмкін, Алматы әкімдігі
Ақтөбедегі жаңа арена қандай болмақ?
Ақтөбеде де жобалау-сметалық құжаттаманы дайындау әлі аяқталған жоқ, бірақ оны жүзеге асыруға 6 миллиард теңгеден аса қаражат бөлінді. Нысан құрылысын 2028 жылы аяқтау уәде етілген.
"Нысанның ерекше реттелетін нысандар қатарына жатуына байланысты жобалау-сметалық құжаттаманы (ЖСҚ) әзірлеу үш кезеңде жүзеге асырылады. Қазіргі уақытта ЖСҚ-ның бірінші кезеңі бойынша сараптаманың оң қорытындысы алынды, ал құрылыс кезеңінің өзіне Қазақстан Республикасы Президентінің резервінен 6,5 миллиард теңге бөлінді. Жобаның екінші және үшінші кезеңдері қазір әзірленіп жатыр. Стадион құрылысын 2028 жылы аяқтау жоспарланған", - деп мәлімдеді Ақтөбе облысының әкімдігі.
Еске салсақ, Ақтөбедегі футбол аренасының құрылысы 2025 жылдың желтоқсанында басталған болатын. 2026 жылдың жазында біздің тілшілер құрылыс алаңында болып қайтты.
Фото: Tengrinews.kz
Қазақстанда стадиондар құрылысы қанша тұрады?
Тәуелсіздік алғаннан бері Қазақстанда төрт жаңа футбол стадионы пайда болды.
Олардың ішіндегі ең ірісі - елордалық "Астана Аренаның" құрылысы сол кездегі бағам бойынша бюджетке 200 миллион долларға - шамамен 30 миллиард теңгеге түсті.
Түркістандағы сыйымдылығы жеті мыңға жуық адамды құрайтын арена 39 миллион долларға (нысан тапсырылған кездегі бағам бойынша - 16 миллиард теңге) салынды. Биыл бұл стадион алғаш рет Чемпиондар лигасының іріктеу матчін қабылдады.
Елордадағы тағы бір спорт нысаны - 3,6 мың адамға арналған Мұңайтпасов атындағы стадионның құны Түркістандағы аренадан да қымбат болып шықты - 16,7 миллиард теңге.
Ал Қызылордадағы "Қайсар Аренаға" соңында 20,9 миллиард теңге жұмсалды. Оған 11 мың адам сыяды.
Бұған дейін Шымкенттегі жаңа стадионның сыйымдылығын 35 мыңнан 60 мың орынға дейін ұлғайту туралы шешім қабылданғаны белгілі болды. Бұл ретте аренаның құрылыс мерзімі әзірге белгісіз.