Ақтауда танымал блогер ұсталды
Жеткізуге уәде берген, бірақ тауар жіберілмеген
Маңғыстау облысы Полиция департаментінің хабарлауынша, сатушы Instagram желісінде түрлі тауарлардың, соның ішінде ыдыс-аяқ пен тұрмыстық техниканың жарнамасын жариялаған. Өнімді ілгерілету үшін танымал аккаунт иесі тартылған.
Жарнамалық жазбаларда тауарлардың бар екені, олардың сапасы және Қазақстанға жеткізу мүмкіндігі туралы айтылған.Қызығушылық танытқан сатып алушылар көрсетілген нөмірлер арқылы сатушымен байланысып, жеке кәсіпкердің шотына ақша аударған. Алайда уәде етілген тауарлар оларға жеткізілмеді.
Тергеу деректері бойынша, түскен қаражат жеке қажеттіліктерге жұмсалған.Құқық қорғау органдары ыдыс-аяқ пен тұрмыстық техника үшін ақша аударған бірнеше жәбірленушіні анықтады.Ұстау туралы не белгілі?
Аталған дерек бойынша Қазақстан Республикасы Қылмыстық кодексінің 190-бабы — "Алаяқтық" бойынша сотқа дейінгі тергеу басталды.
Полицияның хабарлауынша, күдікті ұсталып, уақытша ұстау изоляторына қамалды. Қазіргі уақытта тергеушілер оқиғаның мән-жайын анықтап, басқа да зардап шеккен сатып алушылардың бар-жоғын тексеріп жатыр.
Ведомство әзірге келтірілген шығын көлемі мен жәбірленушілердің нақты санын жариялаған жоқ.
Instagram-дағы бұл жарияланымды көру
Салтанат Аманқосованың жазбасы (@saltanat.a.e.official)
Блогер туралы не белгілі?
Редакция дереккөздерінің мәліметінше, сөз блогер Салтанат Аманқосова туралы болып отыр. Ол 29 жаста, екі баласы - ұлы мен қызы бар. Өзінің Instagram парақшасында ол жеке өмірі туралы контент жариялап, брендтерді жарнамалайды. Сондай-ақ оның профилінде бірнеше жобаның амбассадоры екені көрсетілген.
Instagram-дағы бұл жарияланымды көру
Салтанат Аманқосованың жазбасы (@saltanat.a.e.official)
Маңғыстау облысы Полиция департаменті тұрғындарды әлеуметтік желі арқылы тауарға тапсырыс беру кезінде мұқият болуға, сатушылар туралы ақпаратты тексеруге және күмәнді шоттарға ақша аудармауға шақырды.
Ведомство сонымен қатар тергеу мүддесіне байланысты іс бойынша басқа мәліметтер әзірге жария етілмейтінін атап өтті.
Тергеу жалғасып жатыр.
Тағы оқыңыз: Алматыда екі танымал блогер қамауға алынды