ҚФФ “Ақтөбе“ - “Ордабасы“ арасындағы даулы матчке қатысушыларға қандай жаза қолданылғанын жариялады
Тиісті шешім Қазақстан футбол федерациясының Бақылау, тәртіптік және этикалық комитетінің отырысында қабылданды.
"2026 жылғы маусымдағы Премьер-лиганың 23-туры аясында өткен "Ақтөбе" ФК – "Ордабасы" ФК матчінің қорытындысы бойынша төмендегі шешімдер қабылданды: ойынды ұйымдастыру талаптары мен қауіпсіздік қағидаларын және Чемпионат регламентін бұзғаны, атап айтқанда матчтің ресми тұлғаларының қауіпсіздігін тиісті деңгейде қамтамасыз етпегені, соның ішінде "Ақтөбе" ФК директоры Б. Дүзелбаевтың төрешілер бөлмесіне рұқсатсыз кіргені үшін, Тәртіптік регламенттің 63-бабының 1-тармағына сәйкес, "Ақтөбе" ФК-ға 300 АЕК көлемінде айыппұл салынды. Айыппұл 2026 жылғы 20 қарашаға дейін төленуі тиіс", - делінген ресми мәлімдемеде.
Сонымен қатар "Ақтөбе" клубының директоры Дузельбаевтың төрешілер бөлмесіне рұқсатсыз кіргені үшін (300 АЕК), команда жаттықтырушысы Игорь Черевченконың беделге нұқсан келтіретін мәлімдемелері үшін (50 АЕК) және команданың киім ауыстыру бөлмесінен шығуы кешігіп, матчтің 3 минутқа кешігуіне себеп болғаны үшін (60 АЕК) жаза қолданылды.
Осылайша, "Ақтөбе" клубы жалпы сомасы 410 АЕК, яғни 1 миллион 773 мың 250 теңге төлеуі тиіс.
"Ақтөбе" - "Ордабасы" матчіндегі жанкүйерлерге қатысты дау
Еске сала кетейік, шымкенттік команданың 1:3 есебімен жеңісімен аяқталған матчтен кейін әлеуметтік желілерде трибунадағы плакаттардың біріне қатысты дау туындаған болатын. Кейбір қолданушылар "Ақтөбе" жанкүйерлері ойын кезінде балағат сөздер жазылған, оның ішінде ұлтаралық араздықты қоздыратын мазмұндағы плакат көтергенін атап өтті.
Instagram-дағы бұл жарияланымды көру
???????????????????????????????? • ???????????????????????????????????????????????? (@fcaktobefans) жарияланымы
Плакат ұстап тұрған кәмелетке толмаған қыздарды кейін полиция тауып, олармен профилактикалық әңгіме жүргізді. Қыздардың ата-аналарына әкімшілік жаза қолданылды.
Осыдан кейін клуб басшылығы жанкүйерлерді қолдап мәлімдеме жасап, олардың айыппұлын төлеп беруге дайын екендерін хабарлады.