Алматыда қолы байланған әйел жалаңаяқ көшеде жүрген

Алматы тұрғыны әлеуметтік желіде қолдары байланған, жалаң аяқ әйелдің видеосын жариялады. Ол қараңғы уақытта көшеде жүрген. Полиция тексеру жұмыстарын бастады, деп хабарлайды Tengrinews.kz тілшісі.
Өз ұлы байлап тастаған ба?
Жылап тұрған, жалаң аяқ әйелдің видеосы әлеуметтік желілерде тез тарап кетті. Ролик авторының айтуынша, әйелдің қолы байланған. Сонымен қатар ол аяқ киімсіз және сырт киімсіз болған.
Кейінірек әйелді өз ұлы байлап тастаған болуы мүмкін екені хабарланды.
Алдын ала мәлімет бойынша, жанжал ер адамның анасының оның отбасылық өміріне араласқанына наразылығынан туындаған.
Полицияға ешкім жүгінбеген
Алматы қалалық полиция департаменті аталған дерек бойынша құқық қорғау органдарына ешқандай арыз түспегенін хабарлады. Соған қарамастан, Алатау аудандық ПБ жанындағы полиция бөлімі тексеру шараларын бастады.

"Әйелдің жеке басы анықталды, қазіргі уақытта ол полицияда түсініктеме беріп жатыр", - деп хабарлады ведомство.

Оқиғаның барлық мән-жайы тексеріліп жатқаны нақтыланды. Тексеру қорытындысы бойынша құқықтық баға беріліп, тиісті шаралар қабылданатын болады.
Бұған дейін Түркістан облысында сот қарт әкесін аяусыз соққыға жығып, соның салдарынан жәбірленуші көз жұмған жергілікті тұрғынды алты жылға бас бостандығынан айырған болатын. Апелляциядан кейін жоғары тұрған саты прокуратураның наразылығын қанағаттандырып, алғашқы жазаны қатаңдатты, сондай-ақ марқұмның келінін әрекетсіздігі үшін жауапқа тартты.
Қазақстандық әйел әкесін өз үйінен шығарып тастамақ болған