Қазақстанның ең жүлделі дзюдошысы Азия ойындарының финалына шықты
48 келіге дейінгі салмақ дәрежесінде өнер көрсететін 29 жастағы Қазақстан өкілі жартылай финалда Тайпейден келген Линь Чэньхаодан басым түсті.
Белдесудің аяқталуына бір жарым минут қалғанда қазақстандық спортшы сәтті әдіс жасап, ұпай еншіледі. Бұл жеңіске жетуге және финалға жолдама алуға жеткілікті болды.
Нәтиже 1:0 есебімен Әбиба Әбужақынованың пайдасына шешілді.
Айта кетейік, Әбиба дзюдодан 2026 жылғы Азиаданың финалына дейін жеткен еліміздің алғашқы өкілі болды. Бүгін сондай-ақ Елдос Сметов пен Ғұсман Қырғызбаев та финалға шығу үшін бақ сынайды.
Әбиба Әбужақынова деген кім?
Әбиба - кейінгі жылдардағы әлемнің ең мықты дзюдошыларының бірі және Қазақстандағы ең көп марапатқа ие спортшы. 2022 жылы ол дзюдодан әлем чемпионатының медалін жеңіп алған еліміздің алғашқы өкілі атанды.
Өз мансабында ол әлем чемпионаттарының үш медалін иеленді: 2022 және 2024 жылдары қола, ал 2025 жылы күміс жүлдегер атанды. Бұдан бөлек, оның қоржынында өткен Азиаданың күміс жүлдесі бар. Ол кезде финалда тек Жапония өкіліне жол берген болатын.
Спортшының айтуынша, ол 2028 жылы Лос-Анджелесте өтетін Олимпиада ойындарына қатысуды жоспарлап отыр.
Instagram-дағы бұл жарияланымды көру
JENYS JUDO CLUB | KAZAKHSTAN (@jenysjudoclub) жарияланымы
Еске сала кетейік, Азия ойындары Жапонияның Аичи және Нагоя қалаларында өтіп жатыр және 4 қазанға дейін жалғасады.
Бұған дейін бокстан Қазақстанның екі дүркін әлем чемпионы Алуа Балқыбекова Азия ойындарының қола медалін жеңіп алған болатын.