Қазақстан кроссовка үшін Азиада алтынынан айырылды: не болды?
Азияның жаңа рекордын орнатып, алтын иеленген қазақстандық спортшы рұқсат етілген тізімге кірмейтін кроссовка кигені үшін медалінен айырылды. ҚР ҰОК-ке жолдаған сауалымызға берілген жауапқа сәйкес, ережелер 2026 жылдың көктемінде өзгерген.
Сонымен қатар комитет бұл шешімге кім жауапты деген сұраққа жауап бермеді.
- Қазақстан тарапынан жабдықтың ережелерге сәйкестігіне кім жауап береді? Жеңіл атлетика федерациясының өкілі ме, спортшының жаттықтырушылары ма әлде бүкіл командада осымен айналысатын арнайы админ бар ма? - деп сұрадық ҰОК өкілдерінен.
"Мәреге жеткеннен кейін World Athletics ережелеріне сәйкес ерлер мен әйелдер арасындағы үш жүлдегердің аяқ киімін міндетті тексеру жүргізілді. Тексеру барысында техникалық делегаттар қазақстандық Ясмина Тоқсанбаеваның аяқ киім моделі World Athletics мақұлдаған модельдер тізімінде жоқ екенін тіркеді.Мәселені одан әрі қарастыру үшін қазақстандық спортшының аяқ киімі суретке түсіріліп, тиісті ақпаратпен бірге ресми қорытынды алу үшін World Athletics-ке жіберілді. Халықаралық федерациядан жауап келгенше марапаттау рәсімі кейінге қалдырылды", - деп түсіндірді ҰОК.
Халықаралық жеңіл атлетика федерациясы соңында қазақстандық спортшының пайдасына шешім шығарудан бас тартты.
"World Athletics-тің спорттық аяқ киімге қоятын талаптары халықаралық федерация кеңесінің 2026 жылғы 19 наурыздағы шешімімен жаңартылып, 2026 жылғы 20 сәуірде күшіне енді. Тиісті ақпарат World Athletics мүшесі болатын барлық ұлттық федерацияға жіберілді. Күшіне енген сәттен бастап бұл ережелер барлық жарысқа қатысушылар үшін орындалуы міндетті, ал оларды сақтамау нәтиженің жойылуына әкеп соғуы мүмкін.World Athletics спортшы пайдаланған аяқ киім моделінің жарыстарда пайдалануға мақұлданбағанын ресми түрде растады. Халықаралық федерацияның қолданыстағы ережелеріне сәйкес, мұндай жағдайда спортшының нәтижесі жарамсыз деп танылып, жарыстың қорытынды хаттамасы түзетіледі", - деп хабарлады Tengri Sport.
Айта кетерлігі, мұндай жағдай 2026 жылғы Азиядада бұған дейін де болған. Тіпті, Қазақстан бұл ережеден пайда көрген тараптардың бірі болды.
"Осы Азия ойындарында осындай ереже жетісайыстан сынға түскен ирандық спортшы Мохитзадеге қатысты қолданылған болатын. Тексеруден кейін оның киген аяқ киім моделі де World Athletics мақұлдаған тізімде жоқ екені анықталды.Ережеге сәйкес оның нәтижесі жойылды. Қорытынды хаттаманы түзету нәтижесінде бұған дейін төртінші орында тұрған қазақстандық спортшы Алина Чистякова үшінші орынға көтеріліп, қола медаль иеленді", - дейді ҰОК өкілдері.
Сондай-ақ ҚР ҰОК аппеляция беру мүмкіндігі туралы мәселені пысықтап жатқанын атап өтті.
"Мәселе туындаған сәттен бастап Қазақстан ҰОК қазақстандық спортшыға қажетті қолдау көрсету, сондай-ақ апелляция беру мүмкіндігін қарастыру мақсатында World Athletics, Азия жеңіл атлетика қауымдастығы, Азия Олимпиадалық кеңесі (AOK) және Қазақстан Республикасының Жеңіл атлетика федерациясымен тұрақты байланыста", - делінген мәлімдемеде.
Айта кетейік, Tengri Sport кроссовкаға қатысты жағдайға кім жауапты екенін анықтау үшін Жеңіл атлетика федерациясы мен Туризм және спорт министрлігіне де сауал жолдады.
"Мені мыңдаған бөлшекке бөліп тастады" - медалінен айырылған спортшының пікірі
Медаль ресми түрде Қытай спортшысына берілгеннен кейін Ясмина Тоқсанбаева ҰОК, Спорт министрлігі мен Жеңіл атлетика федерациясына қолдау көрсеткені үшін алғыс айтып, әлеуметтік желіде жай-күйін бөлісті.
"Нәтиже жойылды. Біз соңына дейін күрестік. Мен үшін соңғы сәтке дейін күрескен суперқаһармандарыма рақмет! Жеке жаттықтырушымнан бастап, Қазақстан жеңіл атлетика федерациясының бүкіл құрамына және спорт министріне дейін. Бүгін мені мыңдаған бөлшекке бөліп тастады", - деді спортшы.
Бүгін спортшы көптеген қолдау сөздері жазылған видео жариялап, қазақстандықтарға алғысын білдірді.
"Қазір мен тек сіздердің қолдауларыңыздың мен үшін өте маңызды әрі жағымды екенін айтқым келеді, сіздер осындай қиын сәтте менің жасып қалмауыма көмектесіп жатырсыздар! Тек ғана алға, қазақ елім. Мен әрі қарай қадам басамын, менен олай оңай құтыла алмайсыздар", - деді ол.
Айта кетейік, Ясмина 22 жаста, ол қазірдің өзінде жартылай марафоннан Азия чемпионатының күміс және қола жүлдегері.
Instagram-дағы бұл жарияланымды көру
TOXANBAYEVA YASMINA (@01yasm1na) жарияланымы
Еске сала кетейік, Азия ойындары 4 қазанға дейін жалғасады. Қазіргі уақытта Қазақстан құрамасы медальдар кестесінде 5-орында тұр.
Қазақстан құрамасының Азиададағы алтыны спортшының аяқ киім моделіне байланысты жойылды