Эд Ширан Палестина мәселесіне қатысты жанжалдан кейін жанкүйерлерінен кешірім сұрады
Танымал британдық әнші Эд Ширан Палестина мәселесіне қатысты саяси даудың ортасында қалды. Әнші жанкүйерлерінен кешірім сұрауға мәжбүр болған, деп хабарлайды Тengri Life Sky News басылымына сілтеме жасап.
Британдық әншінің бұған дейінгі мінсіз имиджіне нұқсан келді. Дау рэпер Macklemore-дың Палестинаны қолдаған мәлімдемелері үшін Ширанның турнесінен шеттетілуінен кейін басталды. Бұл шешім сынға ұшырап, кейбір әртістер рэперге қолдау білдіру белгісі ретінде концерттерге қатысудан бас тартты.
Эд Ширан Macklemore-ды турдан шығарғаннан кейін Филадельфиядағы концертте көзіне жас алып кешірім сұрады. Сондай-ақ ол Газадағы жағдайды апатты деп атады.
"Маған қиын шешімдер қабылдауға тура келді, мен қателесемін және сол үшін өте қатты өкінемін. Барлық досым, отбасым мен таныстарым мені тастап кеткендей сезінемін", - деді музыкант.
Ширан өз мансабында "саяси шолушыға" айналмауға тырысқанын және оның музыкасы "бөліну емес, бірлік туралы" болғанын қалайтынын айтты.
Не болды?
4 қыркүйекте Macklemore сахналық есімімен танымал американдық рэпер Бен Хаггерти Нью-Джерси штатындағы стадионда британдық әншінің алдында өнер көрсетіп, сахнадан Палестинаны қолдайтынын мәлімдеді. Ол Израильдің Газа секторындағы әскери операциясына қарсы наразылыққа арналған әнін орындады. Осыдан кейін ол Ширанның турынан шығарылды.
Gillette Stadium стадионының иесі Роберт Крафт рэперге Массачусетстегі бұл алаңда өнер көрсетуге тыйым салып, "өшпенділікті қоздыруға алаң бермейтінін" мәлімдеді.
Көп ұзамай Ширанның концертін ашатын барлық әртіс, соның ішінде оның жеке тобы да Macklemore-мен ынтымақтастық белгісі ретінде қазіргі Loop турында өнер көрсетуден бас тартты.
Ирландияның ірі радиостанциясы Ширанның әндерін эфирден алып тастады, ал Instagram-да оқырмандары одан жаппай бас тарта бастады. Ұлыбританияның Мәдениет министрі әншінің "тығырыққа тірелгенін" атап өтті.