Месси Испаниядағы екінші футбол клубын сатып алуға дайындалып жатыр
Америкалық "Интер Майами" клубының жұлдызды шабуылшысы Лионель Месси Испания чемпионатының екінші дивизионында өнер көрсететін "Эльденсе" клубын сатып алу туралы алдын ала келісімге келді, деп хабарлайды Tengri Sport Marca газетіне сілтеме жасап.
Басылымның мәліметінше, егер мәміле жүзеге асса, бұл аргентиналық футболшының кәсіби испан футболындағы кәсіпкерлік қызметінің бастауы болмақ.
Месси клубтың 100 пайыз акциясын үшінші тұлғалардың қатысуынсыз жеке өзі сатып алуды жоспарлап отырғаны айтылған.
Клуб Аликанте провинциясындағы Эльда қаласында орналасқан. Бұл аймақ Месси "Интер Майамидегі" мансабын аяқтағаннан кейін тұруды жоспарлап отырған Каталонияға жақын жерде орналасқан, делінген материалда.
Мәміле жақын күндері соңғы заңдық және келісімшарттық рәсімдер, соның ішінде клубтың қаржылық және құқықтық жағдайын тексеру аяқталғаннан кейін ресімделуі мүмкін. Сонымен қатар Испанияның Жоғары спорт кеңесінің міндетті мақұлдауы қажет болады.
Айта кетерлігі, қазіргі уақытта "Эльденсе" спорттық тұрғыдан қиын кезеңді бастан өткеріп жатыр. Өткен дүйсенбіде бас бапкер Клаудио Барраган қызметінен босатылды. Ол биылғы маусымда Испанияның екінші дивизионында жұмыстан қуылған алғашқы жаттықтырушы болды. Команда чемпионаттың төрт турында небәрі екі ұпай жинады. Жаңа бас бапкер әлі тағайындалған жоқ.
"Эльденсені" сатып алу Мессинің футбол клубтарына салған инвестицияларының жалғасы болмақ. Осы жылы ол Испанияның төртінші дивизионында ойнайтын "Корнелья" клубын сатып алған болатын.
Еске сала кетейік, бұған дейін Месси Аргентина құрамасындағы мансабын аяқтайтынын айтқан. Ол ұлттық құрама сапында 207 матч өткізіп, 125 гол соқты. Осы уақыт ішінде аргентиналық 2022 жылғы әлем чемпионы, 2021 және 2024 жылдардағы Америка кубогының иегері, 2022 жылғы Финалиссима жеңімпазы және 2008 жылғы Олимпиада чемпионы атанды.