Тегеран Иорданиядағы АҚШ базасына және эсминецтерге жаппай шабуыл жасалғанын хабарлады
Ислам революциясының сақшылар корпусы (ИРСК) Иорданиядағы АҚШ базасына жасалған қарымта соққы барысында F-35, F-16 және F-15 жойғыштардың орналасу және техникалық қызмет көрсету орындарына шабуыл жасағанын мәлімдеді, деп хабарлайды Tengrinews.kz РИА Новостиге сілтеме жасап.
Агенттік материалда Иранның Press TV телеарнасының ақпаратына сілтеме жасайды.
"Агрессорды жазалау мақсатында жүргізілген осы операция нәтижесінде баллистикалық зымырандардың жаппай соққысы... техникалық қызмет көрсету және дайындық ангарларын, жойғыштардың орналасу орындарын, сондай-ақ F-35, F-16 және F-15 ұшақтарына арналған баспаналарды нысанаға алып, қарсылас күштеріне ауыр шығын келтірді", – делінген хабарламада.
Бұл ретте сөз әл-Азрақ әуе базасы туралы болып отырғаны түсіндіріледі.
Сондай-ақ ИРСК қанатты зымырандармен және Aegis жүйелерімен жабдықталған АҚШ Әскери-теңіз күштерінің екі эсминціне зымыранмен соққы жасағанын хабарлады.
Ал Иордания тарапы Ираннан оның бағытына 20 баллистикалық зымыран ұшырылғанын, оның 18-і әуе шабуылына қарсы қорғаныс жүйесімен атып түсірілгенін, ал екеуі елді мекендерден тыс жерге құлағанын мәлімдеді. Зардап шеккендер туралы ақпарат түспеген, делінген агенттіктің тағы бір материалында.
Бұған дейін БАҚ Таяу Шығыстағы АҚШ әскерилері АҚШ өкілдерінің айтуынша, ИРСК-мен байланысы бар бірнеше ирандық танкерге соққы жасағанын хабарлаған болатын. Кейінірек Америка Құрама Штаттарының Орталық қолбасшылығы (CENTCOM) америкалық күштер шикі мұнай тиелген бес ирандық танкерді жойғанын растап, әлеуметтік желілерде видео жариялады. Бұған жауап ретінде Ислам революциясының сақшылар корпусы Кувейт пен Бахрейндегі мұнай танкерлеріне шабуыл жасайтынын айтып қоқан-лоққы көрсетті.
Тағы оқыңыз: Иран АҚШ-тың суасты аппаратын қолға түсіргенін мәлімдеді