“Алматыдағы концертті өзім тоқтаттым“: әзілкеш Ғалым Қалиақбаров мәлімдеме жасады
Стендап-комик Ғалым Қалиақбаров Астанадағы оқиғадан кейін өз концерттерінің тоқтатылғаны туралы айтып берді. Оның сөзінше, ол 21 тамызда Алматыда өтуі тиіс болған кешін өзі тоқтатқан, деп хабарлайды Tengri Life.
Қалиақбаров бұл туралы өзінің Instagram парақшасында жазды. Стендап-комик болған жағдайдан кейін қолдау көрсеткен көрерменіне алғыс айтып, өзін қорғауға тырысқан әйелдерді ерекше атап өтті.
"Сол концерттің барлық көрерменіне рақмет. Әсіресе мені қорғаған батыл әйелдерге алғысым шексіз. Жағдай осылай болғаны үшін кешірім сұраймын", - деп жазды комик.
Ол көрерменге билет ақшасы қайтарылатынын хабарлады, сондай-ақ келесі стендап-концертіне тегін билет сыйлауға уәде берді.
Қалиақбаровтың айтуынша, болған оқиғадан кейін ол алдағы өнер көрсетулерін тоқтату туралы шешімді өз бетінше қабылдаған.
"Осы жағдайдан кейінгі концерттерімді өзім тоқтаттым. Қазір депрессиядан емделіп жүрмін, бұл эпизод маған қатты әсер етті, сондықтан сахнаға шығуға дайын емеспін", - деп жазды Ғалым Қалиақбаров.
Комик Алматы әкімдігіне де жеке тоқталып өтті. Оның айтуынша, концерт тоқтатылғаннан кейін қала билігінің атына жағымсыз пікірлер жазыла бастаған.
"Алматы әкімдігінен кешірім сұраймын, өйткені мен концертті тоқтатқан соң, олардың атына сын айтылып жатқанын естідім. Бұл концертті мен өзім тоқтаттым. Алматы әкімдігіне ешқандай шағымым жоқ. Керісінше, олар бізге концерт өткізуге әрдайым рұқсат беретін. Сынның астында қалғандарыңыз үшін өкінішті", - деді Қалиақбаров.
Не болды?
19 тамызда Ғалым Қалиақбаровтың Астанадағы концерті тоқтатылған болатын.тоқтатылған болатын. Әлеуметтік желілерде оқиға орнынан түсірілген видео пайда болды.
Астана әкімдігі ұйымдастырушылардың іс-шараны өткізу туралы міндетті хабарламаны басталуына 10 күн қалғанда жібермегенін мәлімдеді. Осыған байланысты концерт ресми түрде мақұлданбаған.
Кейінірек Қалиақбаровтың 21 тамызға жоспарланған Алматыдағы концерті де тоқтатылғаны белгілі болды.