Италияда мэрді қағып кеткеннен кейін велосипедтерге тыйым салынды

Италияның Комо қаласының мэрін электрлі велосипед қағып кеткеннен кейін, ол тарихи орталықтағы 30-ға жуық көшеде велосипед қозғалысын шектеу туралы шешім қабылдады. Жаңа ережелер қыркүйек айында күшіне енбек және қазірдің өзінде дау тудырып үлгерді, деп хабарлайды Tengrinews.kz тілшісі Guardian басылымына сілтеме жасап.
Мэрді велосипед қағып кетті
Оқиға маусым айында Алессандро Рапинезе мэрия ғимаратынан шығып бара жатқанда болған. Оны электрлі велосипед мінген адам қағып кетті. Соқтығысуға қатысқан адамның кім екені жарияланған жоқ.
Осыдан кейін әкімшілік тарихи орталықтың шамамен 30 көшесінде қарапайым велосипедтердің де, электрлі велосипедтердің де қозғалысына тыйым салуды ұйғарды. Енді велосипедшілер көліктен түсіп, оны жанында жетектеп жүруге мәжбүр болады.
"Мені велосипед қақты, ақпарат жинадым"
Рапинезе бұл шешімге өз басынан өткен жағдай әсер еткенін жоққа шығармады.

"Маған "бұл шараны өзін электрлі велосипед қағып кеткені үшін енгізді" деп айып тағады. Бұл расында да солай. Адамдар өз тәжірибесіне сүйеніп әрекет етеді, мені мына "аңдардың" бірі қағып кеткенде қандай болатынын өз басымнан білемін", - деді мэр.

Сонымен қатар ол бұл тыйымның басты себебі - жаяу жүргіншілердің қауіпсіздігі екенін айтып отыр. Комо - танымал туристік қала, ал оның тарихи орталығында әрдайым халық көп болады.
Шешім наразылық тудырды
Сыншылар бұл тыйымды тым асыра сілтеу деп санайды және мэрді велосипедшілерге қарсы жеке науқан жүргізіп жатыр деп айыптауда. Белсенділер шектеулерді алып тастауды талап етіп петиция бастады, ал қыркүйек айында велосипедшілер тыйым салынған көшелермен жүріп өту акциясын өткізуді жоспарлап отыр.
Оппоненттер бұл шектеулер курьерлер мен жеткізу қызметін пайдаланатын дүкен иелеріне кері әсерін тигізетінін алға тартқан. Олардың пікірінше, жаппай тыйым салудың орнына, жекелеген велосипедшілердің қауіпті әрекеттерімен күресу керек еді.