Қытайда қуаттау станциясы жанында Zeekr 7X өртенді: компания тексеру жүргізіп жатыр

Қытайда қуаттау станциясы жанында Zeekr 7X электркроссовері өртенді, - деп хабарлайды Tengri Auto CarNewsChina мәліметіне сілтеме жасап.
Не болды?
Бұқаралық ақпарат құралдары мәліметінше, оқиға 9 тамызда Нинбо қаласында болған. Жарияланған видеодан көлік оқиға кезінде қуаттау құрылғысына қосылмағанын көруге болады, сондықтан өрттің шығу себебі әзірге белгісіз.

Көлік кенеттен өртеніп, жарылысқа ұқсас дыбыс шыққан. Содан кейін шанақтан түтін будақтап, тарс-тұрс еткен дыбыстар естіліп, көліктен ұшқын мен жалын шыға бастаған. Дегенмен, Zeekr 7X толығымен өртенбеген.
Зардап шеккендер жоқ. Өртсөндірушілер көлікті сөндіріп үлгерген.
Zeekr өкілдері не дейді?
Оқиғадан кейін компания ресми пікір берді. Zeekr мәліметінше, бұл автомобиль бұған дейін ауыр жол-көлік оқиғасына ұшыраған, бірақ одан кейін ресми сервис орталығында диагностикадан немесе жөндеуден өтпеген. Өрттің нақты себебі қазір анықталып жатыр.
Компания өкілдері ауыр соқтығысудан кейін аккумулятор батареясын, жоғары вольтты жүйені және көлік шанағын тексеру қажет екенін еске салды. Компания пікірінше, мұндай тексеру мен тиісті жөндеудің болмауы қауіпсіздікке қатер төндіруі мүмкін.
Сондай-ақ, компания ескі электр көліктерін сатып алушыларға автомобильдің апаттар тарихы мен жөндеу жұмыстарын, сондай-ақ аккумулятор батареясы мен жоғары вольтты жүйенің жай-күйін тексеруді ұсынды.
Енді Zeekr 7X моделінің өртену себебін мамандар анықтауы тиіс.
Zeekr 7X туралы не белгілі?
Zeekr 7X Қазақстанда үш нұсқада ұсынылған: Standard RWD, Long Range RWD және Performance AWD. Алғашқы екеуі бір электрқозғалтқышы және артқы жетегімен жабдықталған, ал Performance AWD нұсқасы екі электрқозғалтқышы және толық жетекпен жабдықталған.
Күштік қондырғылардың қуаты тиісінше 422 және 630 аттың күшіне жетеді. Тартқыш батарея сыйымдылығы - 75 немесе 100 киловатт-сағат.
WLTP циклі бойынша мәлімделген жүріс қоры 480-нен 615 шақырымға дейін жетеді. Барлық нұсқаның максимал жылдамдығы сағатына 210 шақырыммен шектелген, ал 0-ден 100 шақырымға дейін жылдамдық алу 3,8-ден 6 секундқа дейін уақытты алады.
Көліктің габариттері: ұзындығы - 4,7 метр, ені - 1,9 метр және биіктігі - 1,6 метр. Дөңгелек базасы - 2900 миллиметр, клиренсі - 172 миллиметр.
Қазақстанда Zeekr 7X құны базалық жиынтығы үшін 22,99 миллион теңгеден басталады. Қытайда бұл модель шамамен 15,92-ден 18,69 миллион теңгеге дейін тұрады.