“Нағыз періште“. Жұмыстағы бір күнін көрсеткен алматылық медбике көптің ықыласына бөленді
Перизат неге медицинаны таңдады?
Перизаттың медицина қызметкері болу арманы бала кезінен басталған. Оған денсаулық сақтау саласында еңбек ететін анасы үлгі болды.
Неонатология саласын ол саналы түрде таңдаған: қызды ең кішкентай пациенттерге көмектесу мүмкіндігі қызықтырды.
"Бұл сәбилер әлі өте кішкентай әрі дәрменсіз, олардың жағдайы көбіне сенің қырағылығыңа, қамқорлығыңа және кәсібилігіңе байланысты болады. Олардың жанында болу, күтім жасау және қалай өсіп, сауығып жатқанын көру маған өте ұнайды. Медицина мамандығын таңдағаныма ешқашан өкінген емеспін. Керісінше, күн өткен сайын бұл істің нағыз өз қалауым екенін тереңірек түсініп келемін", - дейді Перизат.
Перизат неонатология бөлімшесіндегі жұмысының алғашқы күндері оңай болмағанын айтты. Оған дейін кішкентай балаларды бағу тәжірибесі мүлдем болмағандықтан, нәрестелермен алғашқы таныстық қобалжумен өткен.
Перизат Өмірбекованың жеке мұрағатынан алынған фото
Instagram-дағы бұл жарияланымды көру
???? Pediatric ICU Nurse (@umirbekovapp) жариялаған жазба
"Мен отбасындағы жалғыз қызбын, сондықтан бұған дейін кішкентай балаларды бағу, тіпті жаңа туған нәрестені қолға алу тәжірибем болмады. Бірақ бірте-бірте үйреніп, бойымда сенімділік пайда бола бастады. Маған ең қымбатын - өз сәбиін сеніп тапсырған аналар ерекше есімде қалды. Аналардың саған жай ғана "рахмет" айтып, баласын құшағыңа жылулықпен тапсырғаны қатты қуантып, күш-жігер беретін", - дейді Перизат.
Instagram-дағы бұл жарияланымды көру
???? Pediatric ICU Nurse (@umirbekovapp) жариялаған жазба
Оның пікірінше, неонатология бөлімшесі медбикесінің ең басты қасиеті - жауапкершілік.
"Өйткені сәбидің қасында тәулік бойы дерлік біз боламыз, сондықтан оның жағдайы мен көңіл күйін жіті қадағалауымыз керек", - дейді ол.
Бұдан бөлек, Перизаттың айтуынша, маманға шыдамдылық, мейірімділік пен ұқыптылық қажет. Ол нәрестелермен жұмыс істегенде тек нұсқаулықпен шектелу мүмкін емес деп есептейді. Себебі әр сәбиге ерекше көзқарас, қамқорлық пен махаббат керек.
"Аналардың алғысы - менің басты мотивациям"
Медбике неонатология бөлімшесіндегі жұмыс тек қуанышты сәттермен ғана емес, сонымен қатар ауыр эмоционалдық сынақтармен де байланысты екенін жасырмады.
"Иә, әрине, жұмысымызда қиын сәттер де болады. Кейде көз жасымызды тыя алмайтындай ауыр тиеді. Біз де пендеміз, бізде де сезім мен уайым бар", - деді медбике.
Оның айтуынша, қиындықтарды жеңуге таңдаған мамандығына деген сүйіспеншілігі мен медицина қызметкерлерінің еңбегі нәрестелер мен олардың отбасылары үшін қаншалықты маңызды екенін түсінуі көмектеседі.
Instagram-дағы бұл жарияланымды көру
???? Pediatric ICU Nurse (@umirbekovapp) жариялаған жазба
Перизат өз жұмысындағы ең әсерлі сәттердің бірі ретінде медициналық ұжымның күш-жігерімен ауыр жағдайды еңсерген нәрестелерді үйіне шығару сәтін атады.
"Бұл - дәрігерлердің, медбикелердің және күн сайын сәбиге күтім жасайтын бүкіл ұжымның орасан зор еңбегі. Барлық күш-жігеріміздің текке кетпегенін көру - біз үшін үлкен қуаныш. Аналардың сәбилерін қолына алып, алғыс айтқандағы бақытты жүздерін көру өте жағымды. Бұл - мен үшін жұмысымды бұдан да зор махаббатпен және жауапкершілікпен жалғастыруға басты мотивация", - дейді Перизат.
"Нағыз періште": қазақстандықтар не жазып жатыр?
Перизаттың бөлімшедегі жұмысы туралы видеолары әлеуметтік желіде қызу талқылана бастады. Кейбір қолданушылар үшін бұл неонатология бөлімшесінің жұмысын іштен көруге мүмкіндік болса, енді біреулер үшін кезінде өз балаларына күтім жасаған жандарды еске алуға себеп болды.
Instagram-дағы бұл жарияланымды көру
???? Pediatric ICU Nurse (@umirbekovapp) жариялаған жазба
Кезінде баласы Перизаттың бақылауында болған аналардың бірі медбикені "адам кейпіндегі нағыз періште" деп атап, отбасының оның қамқорлығы мен қолдауын әлі күнге дейін ризашылықпен еске алатынын жеткізді.
"Жақында АГПҒО-да босандым, ақылы бөлімшеде жаттым. Жолдасым шаруаларымен кеткенде маған көмектескеніңіз үшін рахмет. Баламды жұбатып, қолыңызға алып жүрдіңіз. Сізден мейірім мен қамқорлық еседі. Өз ісіңізді жақсы көретініңіз көрініп тұр", - деп жазды тағы бір ана.
Медбикенің айтуынша, дәл осындай сәттер оның күн сайын неонатология бөлімшесіне не үшін жұмысқа келетінін еске салып тұрады. Әрбір сәби артында ұмытылмас оқиға қалдырады. Әсіресе, пациенттер үйіне шыққаннан кейін бірнеше ай өткен соң келетін хабарламалар медбике үшін өте ыстық.
Перизат Өмірбекованың жеке мұрағатынан алынған фото
"Бала үшін уайымдап, қасында ұзақ уақыт болып, жағдайын бақылап, оның сауығып кетуі үшін қолдан келгеннің бәрін жасауға тырысқанда - мұндай сәттер жүректе ұзақ сақталады. Аналар әлі де хат жазып, есейіп қалған бүлдіршіндердің фотоларын жіберіп, алғыс айтып жатады. Мүмкін, сондықтан да мен әр сәбиге ерекше ықыласпен қарайтын шығармын - мен үшін бұл жай ғана жұмыс емес, өзіммен бірге қалатын кішкентай тағдырлар. Мен үшін бұл өте құнды", - деді қыз.
"Ең үлкен марапат - дені сау сәби"
Әлеуметтік желідегі мыңдаған жылы лебізге қарамастан, медбике өз жұмысының басты құндылығы - бақытты ата-ана мен дені сау сәбилер екенін айтады. Перизат үшін ең үлкен марапат - күш жинаған кезекті бір нәрестенің үйіне, отбасына аман-есен аттанған күні. Ол дәл осындай сәттер үшін медицина саласын таңдауға тұрарлық екенін және бұл оның барлық еңбегінің еш кетпегенінің ең маңызды дәлелі екенін жеткізді.