“Лайықты болса”: бапкер Бразилия құрамасындағы Неймарға қатысты шешімін жариялады
Бразилиялықтардың әлем біріншілігіне баратын құрамын жариялаудағы басты оқиғалардың бірі - үш жыл бойы ТОП-5 лига деңгейінде ойнамаған жұлдызды Неймардың мундиальға қатысу-қатыспауы болды.
Нәтижесінде шабуылшы 2026 жылғы әлем чемпионатының құрамына еніп, Анчелотти өз таңдауын түсіндірді.
"Біз оның мұндай турнирлерге қатысу тәжірибесі қаншалықты маңызды екенін, ұжымның оған деген көзқарасын және оның команда ішінде қалыптастыра алатын атмосферасын түсінеміз. Анық айтқым келеді: Неймар тек лайықты болған жағдайда ғана ойнайды. Алда жаттығулар бар, шешім соның қорытындысы бойынша қабылданады. Менің ойымда бастапқы құрам туралы түсінік бар, бірақ көп нәрсе жаттығу процесіне байланысты. Барлық футболшы жақсы бабында және негізгі құрамда шығуға дайын. Неймардың да міндеті өзгелермен бірдей - құрамаға көмектесу", - деді бапкер құрамды таныстыру барысында.
Еске сала кетейік, 2026 жылғы әлем чемпионаты Неймардың мансабындағы төртінші турнир болмақ - ол құрама сапында 2014, 2018 және 2022 жылдары ойнаған, бірақ команданы чемпиондық атаққа жеткізе алмаған еді.
Сонымен қатар, Неймар - ұлттық құрама тарихындағы үздік сұрмерген (128 ойында 79 гол).
Instagram-дағы бұл жарияланымды көру
Жарияланым: CBF • Seleção Brasileira de Futebol (@brasil)
Бразилия құрамасының ӘЧ-2026-ға арналған құрамы
Турнирге Неймардан бөлек команданың өзге де жұлдыздары - "Реалдың" ойыншысы Винисиус пен "Барселоналық" Рафинья қатысады. Бұдан бөлек, өтінімге Әліптің "Зениттегі" екі командаласы - Луис Энрике мен Дуглас Сантос енді.
Бразилияның 2026 жылғы әлем чемпионатындағы құрамы:
қақпашылар: Алисон Бекер ("Ливерпуль"), Эдерсон ("Фенербахче"), Вевертон Перейра да Силва ("Гремио");
қорғаушылар: Дуглас Сантос ("Зенит"), Алекс Сандро ("Фламенго"), Бремер ("Ювентус"), Данило ("Фламенго"), Габриэл Магальяйнс ("Арсенал"), Рожер Ибаньес ("Аль-Ахли"), Перейра Лео ("Фламенго"), Маркиньос ("ПСЖ"), Уэсли Франса ("Рома");
жартылай қорғаушылар: Лукас Пакета ("Фламенго"), Бруно Гимарайнс ("Ньюкасл"), Каземиро ("Манчестер Юнайтед"), Фабиньо ("Аль-Иттихад"), Данило дос Сантос де Оливейра ("Ботафого");
шабуылшылар: Неймар ("Сантос"), Луис Энрике ("Зенит"), Эндрик ("Лион"), Габриэл Мартинелли ("Арсенал"), Игор Тьяго ("Брентфорд"), Матеус Кунья ("Манчестер Юнайтед"), Рафинья ("Барселона"), Винисиус Жуниор ("Реал Мадрид"), Райан Витор Симплисио Роша ("Борнмут").
Instagram-дағы бұл жарияланымды көру
Жарияланым: CBF • Seleção Brasileira de Futebol (@brasil)
Бразилия құрамасы ӘЧ-2026-да
Еске салсақ, футболдан Бразилия құрамасы АҚШ, Мексика және Канадада өтетін әлем чемпионатында С тобына түсті. Олар Африканың ең мықты командаларының бірі - Мароккомен, сондай-ақ Гаити және Шотландия құрамаларымен ойнайды.
Турнир 11 маусымда басталып, 19 шілдеге дейін жалғасады.