1 мамырдан бастап Қазақстанда не өзгереді?
Мамырдан бастап Қазақстанда бірқатар маңызды өзгеріс күшіне енеді. Астанада LRT іске қосылып, табысты арттыру мен жалақыны көтеру бағдарламасы таныстырылады, қазақстандықтар салық мекемесінен хабарлама ала бастайды, сондай-ақ, келісімшарт бойынша әскери қызметшілерге арналған ережелер жаңартылады. Қазақстандықтардың өміріндегі басты жаңалықтар мен алдағы өзгерістер туралы Tengrinews.kz материалынан оқыңыздар.
Астанада LRT іске қосылады
Сәуірдің аяғында Астана әкімі Жеңіс Қасымбек елордадағы жеңіл рельсті көліктің алдағы апталарда іске қосылуы мүмкін екенін мәлімдеді.
Фото © Tengrinews.kz / Маржан Қуандықова
Қасымбектің айтуынша, LRT-ның барлық сынағы сәтті өткен. Барлық 18 пойыз жұмыс істеп тұр, қозғалыс аралығы – 3,5 минут, жылдамдығы жоғары, яғни көліктің кез келген өзге түрінен екі есе жылдам.
Әкім негізгі станциялардың дайын екенін мәлімдеді. Олардың қатарында - "Абу-Даби Плаза", "Ботаникалық бақ", "Астана Арена", Mega, "Әуежай" және жаңа вокзал бар.
Қазақстандықтардың табысын арттыру
Мамырда үкімет халықтың табысын арттыру бағдарламасын таныстырады. Бұл туралы қаржы вице-министрі Ержан Біржанов хабарлады. Оның сөзінше, қазір құжат мемлекеттік органдармен келісу кезеңінен өтіп жатыр.
Фото:depositphotos.com
Бағдарламада түрлі қолдау шаралары, соның ішінде жалақыны көтеру мәселелері қарастырылған. Атап айтқанда, мұғалімдер мен дәрігерлердің еңбекақысын арттыру жоспарланып жатыр.
Қазақстандықтарға салық қызметінен хабарламалар келе бастайды
Мобильді аударымдарды тексеру қорытындысы бойынша қазақстандықтар салық органдарынан хабарлама ала бастайды. Екінші деңгейлі банктер қазақстандықтардың операциялары туралы мәліметтерді мемлекеттік кірістер органдарына бере бастады.
Сурет нейрожелі көмегімен жасалған
Қаржы вице-министрі Ержан Біржановтың айтуынша, бірінші тоқсанның қорытындысы бойынша мәліметтерді беру 15 сәуірде аяқталады, ал қазақстандықтар хабарламаларды мамырда алады. Осыдан кейін салық мамандары мобильді аударымдарды тексеріп, олардың қайсы үш негізгі критерийге сәйкес келетінін анықтайды:
100 және одан да көп түрлі тұлғадан келген;
қатарынан 3 ай бойы;
жалпы сомасы 1 020 000 теңгеден асатын аударымдар.
Келісімшарт бойынша әскери қызметшілерге арналған жаңа ережелер
2026 жылғы 4 мамырдан бастап Қазақстанда Президент Жарлығымен бекітілген Қарулы Күштердің, басқа да әскерлер мен әскери құралымдардың ішкі қызмет жарғысына енгізілген өзгерістер күшіне енеді.
Фото ©️ Tengrinews.kz / Тұрар Қазанғапов
Түзетулерге сәйкес, келісімшарт бойынша қызмет ететін әскери қызметшілер қызметке тұрған күннен бастап 30 күнтізбелік күн ішінде пайда әкелетін мүлкін сенімгерлік басқаруға беруге міндетті. Бұл меншік құқығындағы немесе өзге де заттық құқықтағы мүлікке қатысты.
Сондай-ақ, түзетулерде келісімшарт бойынша әскери қызметшілердің өздеріне тиесілі тұрғын үйді жалға беруге және одан табыс алуға құқығы бекітілген. Сонымен қатар, олар сенімгерлік басқаруға берілген мүліктен, сондай-ақ, өзге де заңды көздерден табыс ала алады.
Металл сынықтарын сыртқа шығаруға тыйым салынды
2026 жылғы 1 мамырдан бастап Қазақстанда қара және түсті металдардың сынықтары мен қалдықтарын көліктің барлық түрімен сыртқа шығаруға салынған тыйым тағы жарты жылға ұзартылады.
Фото:depositphotos.com
Шектеуге, атап айтқанда, мыс, алюминий, қорғасын қалдықтары мен сынықтары, сондай-ақ, құрамында қорғасын, кадмий немесе сынап бар металл сынықтарының басқа түрлері және сұрыпталмаған сынықтар жатады. Сондай-ақ, қара металл қалдықтары мен сынықтарын, қайта балқытуға арналған шихталық құймаларды, пайдаланылған құбырларды, рельстерді, теміржол төсемі мен жылжымалы құрам элементтерін шығаруға тыйым салынған.
Бұл шара Өнеркәсіп және құрылыс министрлігінің бұйрығымен енгізіліп, 1 мамырдан бастап күшіне енеді.
Сұйытылған газды сыртқа шығаруға салынған тыйым ұзартылды
2026 жылғы 14 мамырдан бастап Қазақстанда сұйытылған мұнай газын, сондай-ақ, пропан мен бутанды автомобиль және теміржол көлігімен сыртқа шығаруға алты ай мерзімге тыйым салу жоспарланып отыр.
Фото ©️ Tengrinews.kz / Тұрар Қазанғапов
Тиісті бұйрықтың жобасын Энергетика министрлігі дайындады. Ведомство бұл шара елдің ішкі нарығын сұйытылған мұнай газымен тұрақты және үздіксіз қамтамасыз етуге бағытталғанын түсіндірді.
Алматыда субұрқақтар маусымы басталады
Алматыда мамырдың басынан бастап қалалық субұрқақтар кезең-кезеңімен іске қосыла бастайды. Бұл маусымда барлығы 55 коммуналдық субұрқақ кешені, соның ішінде 11 "құрғақ" субұрқақ жұмыс істейді деп жоспарланған.
Субұрқақтар 1 қазанға дейін күн сайын сағат 08:00-ден 23:00-ге дейін жұмыс істейді. Бұл ретте олардың жұмысы ауа райы жағдайына байланысты болады – температура +5 градустан төмендеген кезде жұмыс уақытша тоқтатылады.
Балық аулауға шектеулер енгізіледі
2026 жылғы 13 мамырдан бастап Қазақстанда балықтардың уылдырық шашуы мен су биоресурстарының көбею кезеңінде балық аулауға шектеулер мен тыйымдар күшіне ене бастайды.
Фото:depositphotos.com
Бұл шара бірнеше ірі балық шаруашылығы бассейндеріне, соның ішінде Арал-Сырдария, Балқаш-Алакөл, Зайсан-Ертіс, Есіл, Нұра-Сарысу, Тобыл-Торғай, Жайық-Каспий бассейндері мен Қиғаш өзеніне, сондай-ақ, Шу-Талас бассейніне қатысты.
Қазақстандықтар мамырда қанша күн демалады?
2026 жылғы мамыр Қазақстанда мерекелік демалыс күндерінің саны бойынша ең қарбалас айлардың бірі болмақ. Ел тұрғындары мемлекеттік мерекелер мен Құрбан айтқа байланысты қосымша демалады.
Бес күндік жұмыс аптасында қазақстандықтарды 14 демалыс күні, алты күндік аптада - 9 болмақ.
+44 градусқа дейінгі аптап пен үсік: 2026 жылғы мамыр қандай болады
"Қазгидромет" синоптиктері Қазақстандағы 2026 жылғы мамырға арналған ауа райы болжамын ұсынды. Мамандардың мәліметінше, жалпы ел бойынша ауа райы әдеттегіден жылырақ болады және жауын-шашын әркелкі түседі деп күтіледі.
Фото:depositphotos.com
Қазақстанның басым бөлігінде мамырдағы орташа айлық температура +14…+19 градус шамасында болады деп болжанды. Оңтүстік-батыста, оңтүстікте және қиыр оңтүстік-шығыста ауа райы жылырақ - +20-дан +24 градусқа дейін болады.
Елдің оңтүстік-шығысы мен шығысындағы таулы аймақтарда температура шамамен +12…+14 градус. Климаттық нормадан ауытқу көрсеткіші жоғарылау жағына қарай +1…+2 градус.