Қақпашы “Реалдың” Чемпиондар лигасы матчінде соғылған ғажайып голды қайталап, командасын құтқарып қалды
"Торонто" қақпашысы Лука Гавран MLS тұрақты чемпионаты ойынында "Бенфика" - "Реал" матчіндегі Анатолий Трубиннің ерлігін қайталады, деп хабарлайды Tengri Sport.
Екінші таймға қосылған уақытта, есеп 2:3 болып "Филадельфия Юнионның" пайдасына шешіліп жатқанда, қақпашы қарсыластың айып алаңына барды.
Доп айып алаңы үстінде ары-бері серпіліп, ақырында оны Гавран баспен қақпаға кіргізе алды.
Матч 3:3 есебімен тең аяқталды, ал кездесуден кейін күн қаһарманы қақпашы болғанға дейін шабуылда ойнағанын айтты.
"Шамасы, 10 секунд қалған еді. Қосалқы құрам орындығы жаққа қарап едім, бәрі алға баруымды ишаралап жатыр екен, мен де "неге бармасқа?" деп ойладым. "Жарайды, тек өз жүгірісіңді қайтала" дедім іштей. Одан кейін бәрі майдан қыл суырғандай оңай болды – кезінде "тоғызыншы" позицияда ойнап едім ғой!" – деп келтіреді қақпашының сөзін MLS баспасөз қызметі.
Айта кетейік, Лука Гавран MLS тарихында гол соққан небәрі үшінші қақпашы атанды, ал бұған дейінгі мұндай жағдай осыдан 16 жыл бұрын – 2010 жылдың қазанында болған еді.
Чемпиондар лигасының плей-офф кезеңі үшін тартыстағы Трубиннің ғажайыбы
Еске сала кетейік, осы маусымда қақпашының қатысуымен тағы бір маңызды гол соғылған болатын. Португалиялық "Бенфика" топтық кезеңнің соңғы матчінде өз алаңында "Реалды" жеңіп жатты, бірақ плей-оффқа шығу үшін оларға голдар айырмашылығын жақсарту қажет болды.
Кездесу соңында испаниялықтар қақпасына айып соққысы белгіленді, "Бенфика" қақпашысы Анатолий Трубин қосалқы құрам орындығынан ишара алған соң қарсылас айып алаңына жүгірді. Фредрик Эурснес допты дәл қақпашының басына асырды, ал ол әріптесінің қақпасын дәл көздеп, командасын плей-оффқа шығарды.
Нәтижесінде "Реал" мен "Бенфика" 1/16 финалда өзара кездесті, бірақ бұл кезеңде испаниялықтар мықтырақ болып шықты.
Мадридтік "Реал" Чемпиондар лигасының 1/4 финалына дейін жетіп, онда мюнхендік "Бавариядан" жеңіліп, турнирден шығып қалды.