Щучинскідегі жарылыс 11 адамның өмірін қиды: қаза тапқандардың отбасыларына қандай төлемдер берілді?
Мән-жайы
Щучинскідегі "Палау орталығы" дәмханасындағы қайғылы оқиға 2026 жылғы 26 ақпанда кешкі уақытта болды. Өрттен кейін бірден жеті адамның қаза тапқаны хабарланды: бес адам оқиға орнында мерт болса, тағы екеуі жансақтау бөлімінде көз жұмды.
Қайғылы жағдайдан кейін Бурабай ауданының әкімі Арай Садықов БАҚ өкілдеріне оқиға салдарынан 28 адам зардап шеккенін, жеті адам қаза тапқанын, олардың арасында кәмелетке толмаған бір бала бар екенін айтты.
Әкім сол кезде қаза тапқандардың отбасылары мен зардап шеккендерге материалдық көмек көрсетілетінін хабарлаған болатын. Журналистермен кездесуде Садықов әкімдік жерлеу рәсімдерін ұйымдастырып, қаралы жиынға келген туыстарын орналастыру мен сүйемелдеуді қамтамасыз еткенін мәлімдеді.
Кейін қаза тапқандар саны артып, 3 наурызда 9 адамға, 11 наурызда – он бір адамға жетті.
Оқиға фактісі бойынша Қылмыстық кодекстің 292-бабы 3-бөлігі "Абайсызда екі немесе одан да көп адамның өліміне әкеп соққан өрт қауіпсіздігі талаптарын бұзу" бойынша қылмыстық іс қозғалды. Бап санкциясы 5 жылдан 10 жылға дейінгі мерзімге бас бостандығынан айыруды көздейді.
Облыстық денсаулық сақтау басқармасының мәліметінше, қайғылы оқиға салдарынан 28 адам зардап шегіп, оның 11-і қаза тапты, көбісі әртүрлі дәрежеде күйік алған.
Зардап шеккен 17 адамның 8-і амбулаториялық ем алды, бес адам санавиациямен Астанаға, тағы төртеуі Көкшетаудағы облыстық ауруханаға жеткізілді.
Қазіргі уақытта зардап шеккен алты адам ем қабылдауды жалғастыруда: үшеуі — Астанада, үшеуі — Көкшетауда.
"Қазіргі уақытта жансақтау бөлімінде пациенттер жоқ", - деп хабарлады облыстық денсаулық сақтау басқармасы.
Қандай өтемақы төленді?
Еске сала кетейік, қайғылы оқиғадан кейін Бурабай ауданының әкімі Арай Садықов қаза тапқандардың отбасыларына екі миллион теңге көлемінде, ал зардап шеккендерге бір миллион теңгеден біржолғы материалдық көмек төленетінін айтқан еді.
Әкімдік мәліметінше, қазіргі уақытта төлемдер толықтай жүргізілді. Қаражат үш көзден бөлінген:
әкімдіктен жалпы сомасы 30 миллион 200 мың теңге;
"Палау орталығынан" жалпы сомасы 43 миллион 777 мың теңге;
бизнес өкілдерінен жалпы сомасы 10 миллион 219 мың теңге.
Төлемдердің жалпы сомасы 84 миллион 113 мың теңге болды.
"Бурабай ауданының әкімдігі мен қайғылы оқиға болған дәмхана иесі тарапынан қаза тапқандардың отбасыларына бірден 2 миллион теңгеден төленді. Сонымен қатар жерлеуге қатысты барлық шығын, соның ішінде қаза тапқандардың бірін тасымалдау шығыны өтелді", - деп нақтылады Бурабай ауданының әкімдігі.
Сондай-ақ, онда зардап шеккендерге өтемақы алған жарақаттарының ауырлығы мен қажеттіліктеріне қарай төленгені атап өтілді.
Тергеу қай кезеңде?
Ақмола облыстық прокуратурасының мәліметінше, қазіргі уақытта сотқа дейінгі тергеу жалғасып жатыр: барлық жағдайды, соның ішінде жарылыс алдындағы жайттарды анықтау бойынша тергеу амалдарының кешені жүргізіліп жатыр.
Бұған дейін "Loft палау орталығы" дәмханасын жалға алушы өрт қауіпсіздігі талаптарының сақталуына жауапты тұлға ретінде күдікті деп танылғаны хабарланған болатын. Оған қатысты қамауда ұстау түріндегі бұлтартпау шарасы таңдалды.
"Тергеу нәтижесі бойынша басқа адамдардың іс-әрекетіне құқықтық баға беріледі", - деп хабарлады прокуратура.
5 наурызда Щучинскідегі дәмхана иесінің екі айға қамалғаны белгілі болды.
Дәмхана неге тексерілмеді?
Щучинскідегі қайғылы оқиғадан кейін қазақстандықтар желіде "бұл төтенше жағдай қалай болуы мүмкін, мекемедегі өрт қауіпсіздігі мен газ жабдықтарының жұмысын кім бақылауы керек еді?" деген сұрақтар қойды.
Редакция тілшілері бұл сұрақты Ақмола облысы прокуратурасына жолдады, біз алған жауап:
"Нысан Бурабай ауданы ТЖ бөліміне қарасты бақылаудағы нысандар тізбесіне енгізіліп, тәуекел деңгейі төмен санатқа жатқызылған. Тиісінше, Кәсіпкерлік кодекске сәйкес жоспардан тыс тексерулерді қоспағанда, мұндай нысандар барып, профилактикалық бақылау жүргізуге жатпайды".
Бұл ретте мекеменің бес қабатты көппәтерлі тұрғын үй жанындағы бір қабатты ғимаратта орналасқаны бөлек атап өтілді.
"2023 жылы нысан дәмхана ретінде қайта жабдықталып, "Сәулет, қала құрылысы және құрылыс қызметі туралы" заңға сәйкес меншік иесі тарапынан дербес пайдалануға берілген", - деп түсіндірді прокуратура.
Бұған дейін Астанадағы Түркістан көшесінде орналасқан тұрғын үйдің 15-қабатындағы пәтерден өрт шықты. Тілсіз жау ауыздықталғаннан кейін құтқарушылар оқиға орнынан үш баланың мәйітін тапты. Олардың анасы болуы мүмкін делінген (бірақ ресми түрде расталмаған) әйел құтқарылды. Денесін күйік шалған ол ауруханаға жатқызылды. Жағдайы ауыр деп бағаланып отыр.