Жавоҳир Синдоров Хикару Накамура билан дурангни қандай изоҳлади?

Ўзбекистонлик шахмат юлдузи Жавоҳир Синдоров Номзодлар турнирининг 12-турида америкалик гроссмейстер Хикару Накамура билан бўлиб ўтган учрашувда қайд этилган дуранг юзасидан ўз фикрларини билдирди.

Ушбу партия турнир тарихидаги энг қисқа учрашувлардан бири сифатида қайд этилди. Томонлар каталонча дебютнинг бир вариантини танлаб, тахминан 35 дақиқадаёқ дурангга келишишди.

Синдоров матбуот анжуманида бу турдаги асосий мақсади кучни тежаш ва ортиқча таваккалчиликдан қочиш бўлганини очиқ билдирди. Унинг таъкидлашича, олдинги турда Фабиано Каруанага қарши ўйин жуда оғир ўтган ва бу уни анча чарчатган.

— “Бугунги дуранг яхши натижа. Ҳозирги ҳолатда Накамура билан узоқ ва оғир партия ўйнаш учун сабаб кўрмадим. Шунинг учун хавфли вариантларга киришмадим. Агар у узоқ ўйин хоҳласа, мен тайёр эдим. Лекин у ҳам эҳтиёткор йўл танлашини кутдим. Ҳатто партиядан олдин тез дуранг бўлишини сезгандим. Кечаги ўйин жуда оғир бўлганди ва чарчоқ бор эди,” — деди Жавоҳир Синдоров.

Бу турда унинг энг яқин рақиби бўлган нидерландиялик Аниш Гири ҳам дуранг қайд этди. Шу тариқа турнир якунига икки тур қолганида Синдоров (9 очко) ва Гири (7 очко) ўртасидаги фарқ 2 очкога тенг бўлиб қолмоқда.

Энг муҳим жиҳат — навбатдаги турда айнан шу икки шахматчи ўзаро тўқнаш келади. Бу баҳсдаги дуранг натижаёқ Синдоровга муддатидан аввал ғалабани таъминлаши мумкин. Гири учун эса биринчи ўрин фақат назарий имконият сифатида қолмоқда.

Синдоров бу ўйинга тўлиқ тайёргарлик билан чиқишини таъкидлади:

— “Аниш эҳтимол узоқ партия ўйнайди. Мен эса ҳар қандай вазиятга тайёрман. Агар у ютишга ҳаракат қилса, мен ҳам курашаман. Лекин турнир ҳолатига қараб ҳаракат қиламан. Тайёргарликни ChessBase орқали олиб бораман, партияларини таҳлил қиламан. Унинг ижтимоий тармоқларда нима ёзаётгани мен учун аҳамиятли эмас,” — деди у.

Турнирда 13 апрел дам олиш куни бўлиб ўтди. Синдоров бўш вақтни дам олиш ва енгил фаолиятлар билан ўтказишни режалаштирганини айтди.

— “Дам оламан, видеоўйинлар ўйнайман. Балки Counter-Strike ҳам ўйнарман,” — деди у табассум билан.

13-тур учрашувлари 14 апрел куни Тошкент вақти билан 17:45 да бошланади. Синдоров Гирига қарши қора доналарда ҳаракат қилади. Илк даврадаги ўйинда улар дуранг қайд этган эди.

Агар Синдоров ушбу турнирда чемпионликни таъминласа, у жаҳон чемпиони унвони учун Доммаражу Гукеш билан ўйнаш ҳуқуқини қўлга киритади.