Ligjvënësit izraelitë i kërkojnë Qeverisë të aneksojë Bregun Perëndimor
Më shumë se 70 ligjvënës izraelitë kanë miratuar një rezolutë më 23 korrik, përmes së cilës i bëhet thirrje Qeverisë të vendosë sovranitet mbi Bregun e pushtuar Perëndimor, edhe pse ky veprim simbolik nuk ndikon në statusin ligjor të territorit palestinez.
Votimi i rezolutës në Parlamentin izraelit, që nuk ka fuqi detyruese, u mbështet nga anëtarët e koalicionit të djathtë të kryeministrit Benjamin Netanyahu, si dhe nga disa deputetë opozitarë.
Ata thanë se aneksimi i Bregut Perëndimor “do ta forcojë shtetin e Izraelit, sigurinë e tij dhe do të parandalojë çdo vënie në dyshim të së drejtës themelore të popullit hebre për paqe dhe siguri në atdheun e tyre”.
“Sovraniteti në Xhudea dhe Samaria” – emërtimi që Izraeli përdor për Bregun Perëndimor, të cilin e ka pushtuar që nga viti 1967 – ishte “një pjesë përbërëse e realizimit të sionizmit dhe vizionit kombëtar të popullit hebre”, thuhet në tekstin e mocionit.
Rezoluta u miratua me 71 vota për, 13 kundër dhe 36 abstenime.
Hussein al-Sheikh, zëvendësi i presidentit të Autoritetit Palestinez, Mahmud Abbas, e cilësoi rezolutën si një “sulm të drejtpërdrejtë ndaj të drejtave të popullit palestinez” që “minon perspektivat për paqe, stabilitet dhe zgjidhjen me dy shtete”.
“Këto veprime të njëanshme të Izraelit shkelin hapur të drejtën ndërkombëtare dhe konsensusin ndërkombëtar sa i përket statusit të territoreve palestineze, përfshirë Bregun Perëndimor”, shkroi ai në X.
Rreth 500.000 izraelitë jetojnë në vendbanime në Bregun Perëndimor, ku jetojnë afërsisht 3 milionë palestinezë.
Ndërtimet e vendbanimeve atje dënohen rregullisht nga Kombet e Bashkuara dhe konsiderohen të paligjshme sipas së drejtës ndërkombëtare.
Ato shihen si një nga pengesat kryesore – bashkë me dhunën e vazhdueshme mes dy palëve – për një marrëveshje të qëndrueshme të paqes përmes krijimit të një shteti palestinez, që do të kishte autoritet mbi Bregun Perëndimor dhe Rripin e Gazës.
Izraeli i pushtoi Bregun Perëndimor, së bashku me Gazën dhe Jerusalemin Lindor gjatë Luftës të Lindjes së Mesme më 1967. Palestinezët duan që këto tri territore të jenë pjesë e shtetit të tyre në të ardhmen.
Tre milionë palestinezë në Bregun Perëndimor jetojnë nën sundimin ushtarak izraelit, ndërkaq Autoriteti Palestinez, që mbështetet nga Perëndimi, ka kontroll të kufizuar në qendrat e populluara.