Додик порача дека не ги прифаќа одлуките на високиот претставник Шмит
Неговата изјава следува еден ден откако Шмит отфрли две антидејтонски одлуки на собранието, дека РС нема да ги почитува одлуките на Уставниот суд на Босна и Херцеговина и одлуките на високиот претставник.
„Нема да прифатиме каква било одлука што ја донел тој (Кристијан Шмит). Ако Обвинителството и Судот на Босна и Херцеговина постапат според неговите одлуки, ќе донесеме закон во РС со кој ќе ги отфрлиме тоа обвинителство и Судот“, рече Додик, претседател на владејачкиот Сојуз на независни социјалдемократи во РС (СНСД).
Додик во своето обраќање до медиумите рече и дека е можно до крајот на годината „Република Српска да распише референдум за важни прашања“.
Во саботата, 1 јули, Шмит ги запре сите процеси поврзани со законите на собранието на ентитетите за непочитување на одлуките на Уставниот суд на Босна и Херцеговина и необјавување на одлуките на високиот претставник во Службен весник на РС, што би значело дека одлуките на високиот претставник повеќе нема да се признаваат како официјални.
Во последното извршување на овластувањата во Бон, Шмит ги промени и одредбите од Кривичниот законик на БиХ, проширувајќи го така што дејствијата што го нарушуваат уставниот поредок ќе се третираат како кривично дело. Непочитувањето на одлуките на високиот претставник во Босна и Херцеговина е исто така криминализирано.
Официјални претставници на РС, предводени од Додик, ја оспоруваат легитимноста на високиот претставник, бидејќи на неговото официјално назначување во Советот за безбедност на Обединетите нации се спротивставија Кина и Русија. Други земји рекоа дека нема потреба од тоа.
Додик рече дека тоа е „синхронизиран, гнасен, дизајниран напад врз Република Српска и Србија со цел да се соборат властите во РС и Србија и да се персонализира вината на претседателите и носителите на најважната политичка моќ со цел да се ослабне народот, волјата за борба, а со тоа и борбата за држави“.
Додик, додаде дека „засега не го оспорува територијалниот интегритет на Босна и Херцеговина, туку го оспорува нејзиниот суверенитет, бидејќи е загрозен“.