АҚШ Россия фуқароси Матвеевни қўлга олишга кўмаклашганларга 10 миллион доллар ваъда қилмоқда

АҚШ Давлат департаменти жорий ҳафта бошида Россия фуқароси Михаил Павлович Матвеевни қўлга олишга кўмаклашувчи ахборотни берган шахсларга 10 миллион доллар мукофот ваъда қилмоқда. “Америка овози” радиосининг хабар беришича, АҚШда у трансмиллий уюшган жиноий гуруҳга алоқадорликда айбланмоқда.


Давлат департаменти баёнотида қайд этилишича, Матвеев трансмиллий уюшган жиноий гуруҳ таркибида кибержиноятларни содир этган. Жумладан, у АҚШ ҳуқуқ-тартибот органлари, жаҳондаги қатор ташкилотлар ва корхоналарга товламачилик мақсадида киберҳужумларни уюштирганликда гумонланмоқда.



“Товламачилик қилиб пул ундириш мақсадида амалга оширилган киберҳужумлар оқибатида сезиларли даражада зиён кўрилди. Россия кибержиноятчилар учун хафсиз бошпанага айланди. Россияда улар бемалол АҚШга, бизнинг ҳамкорларимиз ва иттифоқчиларимизга қарши ўзларининг ёмон ниятли кибер операцияларини амалга ошириши мумкин”, - дейилади Давлат департаменти баёнотида.



АҚШ Адлия вазирлиги Матвеевга нисбатан Колумбия округи ва Нью-Жерсида билдирилган айблов хулосаларини эълон қилди. АҚШ Молия вазирлиги Матвеевга қарши молиявий санкциялар жорий этди.