Ադրբեջանցիները չեն թույլատրել ռուս խաղաղապահների ավտոշարասյանը անցնել Լաչինով. Արցախի ՄԻՊ

Արցախի մարդու իրավունքների պաշտպան Գեղամ Ստեփանյանը Թվիթերում ներկայացրել է տեսանյութ, որում ռուս խաղաղապահը մոտենում է բնապահպաններ ներկայացող ադրբեջանցիներին, խնդրում ճանապարհ բացել դեպի Լաչինի միջանցք խաղաղապահների ավտոշարասյան համար։


«Մերժվելով նա հրամայում է շրջվել և հետ գնալ։

Ադրբեջանական կեղծ հորինվածքի ևս մեկ ապացույց», - կից հավելել է Գեղամ Ստեփանյանը:




 


Արցախը Հայաստանին կապող ճանապարհը փակ է արդեն տասը օր:


Ռուսաստանը ավելի վաղ հայտարարել էր, թե Լաչինի միջանցքը մասնակի գործում է՝ հավանաբար նկատի ունենալով այն, որ բլոկադայի նախորդ օրերին այդտեղով անարգել անցել են ռուս խաղաղապահների բեռները և ընդամենը մեկ հայկական շտապօգնության մեքենա, որը Կարմիր խաչի ուղեկցությամբ կարողացել է Ստեփանակերտից Երևան հասցնել ծանր վիճակում գտնվող մեկ հիվանդի։


Տասը օր է՝ Հայաստանից Արցախ որևէ մեքենա չի մտել: