არესტოვიჩი: „სააკაშვილი ხელში ჩაუვარდათ და ცხელ ტაფასავით აღარ იციან რა უყონ“
19 დეკემბერს უკრაინის პრეზიდენტმა ვოლოდიმირ ზელენსკიმ საქართველოს მთავრობას მიმართა.
„უნდა გამოვიჩინოთ გულმოწყალება, განსაკუთრებით წინასაშობაოდ. ის, რაც მიხეილის თავს ხდება, აბუჩად აგდებაა. ეს საქართველოს არ შეეფერება და უნდა შეწყდეს...“, - ზელენსკიმ იქვე თქვა, რომ მზად არიან სააკაშვილს უკრაინის კლინიკაში უმკურნალონ, მას მიიღებენ ევროპისა და ამერიკის კლინიკებიც.
მიხეილ სააკაშვილი უკრაინის მოქალაქეა. მას უკრაინის ხელისუფლებაში თუ ოპოზიციაში თითქმის იმდენივე წელი აქვს გატარებული, რამდენიც ქართულ პოლიტიკაში. 2015 წლიდან ჯერ უკრაინის რეფორმების საერთაშორისო მრჩეველთა საბჭოს ხელმძღვანელი იყო, შემდეგ ოდესის ოლქის გუბერნატორი, შემდეგ ოპოზიციური პარტიის ხელმძღვანელი, ბოლოს კი - ზელენსკის პრეზიდენტად არჩევის შემდეგ - ისევ რეფორმების მრჩეველთა საბჭოს თავმჯდომარე.
ორიოდე კვირის წინ იუთუბარხზე სააკაშვილის „გადარჩენა“ განიხილეს რუსმა წამყვანმა მარკ ფეიგინმა და უკრაინის პრეზიდენტის კაბინეტის მრჩეველმა ალექს არეტოვიჩმა.
„მისი მომხრეები, მათ შორის უკრაინელები ამბობენ, რა კარგი იქნებოდა სააკაშვილი ახლა უკრაინაში ყოფილიყო, ის ხომ უკრაინის მოქალაქეა. ამ ბრძოლაში დაგვეხმარებოდაო“, - თქვა მარკ ფეიგანმა, რაზედაც არისტოვიჩმა უპასუხა, რომ ეს არც თუ ადვილად გადასაჭრელი საკითხია.
„ის ხომ საქართველოს მოქალაქეც არის, საქართველოს ყოფილი პრეზიდენტი... მაგრამ ესეც არ არის მთავარი. მთავარი ისაა, რომ ქართული სასამართლო მას დამნაშავედ მიიჩნევს... პოლიტიკური თვალსაზრისით კი მათ ის აშკარად არ უნდათ, ეშინიათ მისი, მტრად მიიჩნევენ... სააკაშვილი ძალიან მასშტაბური და რთული პიროვნებაა. ის შეიძლება უსასრულოდ აკრიტიკო, არსებობს ამის მიზეზი და შეიძლება მუდმივად აღფრთოვანებული იყო მისით, ამასაც თავისი მიზეზი აქვს. რა უნდა მოუხერხონ ფიგურას, რომელიც სასწორზე გახურებული გირივით დევს?.. მოკვლას ვერ ბედავენ, გადაცემას ვერ ბედავენ, მაშინ მოდი, ნელ-ნელა გავანადგუროთო. ხელში ჩაუვარდათ და ცხელ ტაფასავით აღარ იციან რა უყონ. ისეთი მასშტაბის ფიგურაა, ისინი ყველა ერთად რომ აიღო ამ ერთი კაცის ფასი მაინც არ ექნებათ“, - თქვა არესტოვიჩმა და იქვე დაამატა, რომ ერთ-ერთი გამოსავალი სააკაშვილის მესამე ქვეყნისთვის გადაცემა იქნებოდა, სადაც ის მკურნალობას, ქართული მხარე კი გამოძიებას გააგრძელებდა.
„თუ სააკაშვილი ციხეში მოკვდა, საქართველოს ხელისუფლება ამ ლაქას ვერასდროს ჩამოირეცხავს. ვერასდროს დაამტკიცებს, რომ ამის თავიდან ასაცილებლად ყველაფერი გააკეთა“, - განაცხადა არესტოვიჩმა.
ისევე როგორც საქართველოში უკრაინაშიც დიდი რეზონანსი გამოიწვია პენიტენციალური სამსახურის მიერ გავრცელებულმა საავადმყოფოს კადრებმა. უკრაინის რადის რწმუნებული ადამიანის უფლებების საკითხებში დმიტრი ლუბინეცი ითხოვს, მისთვის სააკაშვილის მონახულების უფლება მისცენ. პრეზიდენტის კაბინეტის მრჩეველმა მიხაილ პოდოლაკმა კი თქვა, რომ უკრაინა მზადაა, მიიღოს სააკაშვილი.
„შეუძლებელია უყურო, როგორ კვდება ადამიანი პირდაპირ ეთერში... შეუძლებელია უყურო, ცივილიზებული სამყაროს თვალწინ, როგორ ანადგურებენ საქართველოს ისტორიას და მის პრეზიდენტს“, - დაწერა მან ტვიტერზე.
ვლადიმირ ზელენსკის მიმართვა შეაფასა პოლიტოლოგმა იგორ რეიტეროვიჩმა. რადიო НВ-ის ეთერში მან თქვა, რომ უკრაინა შეეცდება დაიბრუნოს თავისი მოქალაქე, განურჩევლად იმისა, ვინ არის ის და სად არის. მან ასევე თქვა, რომ საქართველოს ხელისუფლება ცდილობს, სააკაშვილს ჩირქი მოსცხოს და ამ კადრების გავრცელებაც ამ პროპაგანდის ნაწილია. კითხვაზე გაართულებს თუ არა ზელენსკის მიმართვა საქართველოსთან ურთიერთობას, პოლიტოლოგმა უპასუხა, რომ საქართველოს მთავრობასთან უკრაინას ისედაც რთული ურთიერთობა აქვს, ხალხი კი პირიქით უკრაინის მხარეზეა და ყველანაირად თანაუგრძნობს.
რადიო თავისუფლების კიევის ბიუროს ეთერში საქართველოს პარლამენტის წევრმა ხატია დეკანოიძემ ზელენსკის მადლობა გადაუხადა და სააკაშვილის მდგომარეობაზე უკრაინის აუდიტორიისთვის ისაუბრა.
„ძალიან ცუდად არის. არ ვიცით, რა როგორ იქნება… სააკაშვილი საქართველოს პირველი პრეზიდენტია, რომელიც პუტინს ღიად დაუპირისპირდა და ახლა ის ციხეში ზის“, - თქვა მან.
ვოლოდიმირ ზელენსკის მიმართვა ინტერპრეტაციისთვის გამოიყენა „ქართული ოცნების" თავმჯდომარემ ირაკლი კობახიძემ. მან თქვა, რომ უკრაინის ხელისუფლება უშუალოდ იყო ჩართული „სააკაშვილის საქართველოში გამოგზავნის სპეცოპერაციაში“, რომლის მიზანი საქართველოს ომში ჩართვა იყო.
კობახიძის განცხადებას თავის მხრივ გამოეხმაურა უკრაინის საგარეო საქმეთა სამინისტროს ოფიციალური წარმომადგენელი ოლეგ ნიკოლენკო. მან ფეისბუკზე დაწერა, რომ იმედგაცრუებულია, საქართველოს ხელისუფლების სპეკულაციებით: „რა ინსინუაციებს აღარ გაავრცელებენ ცალკეული ქართველი პოლიტიკოსები იმისთვის, რომ მოიხსნან პასუხისმგებლობა საქართველოში ადამიანის უფლებების უხეშ დარღვევებზე“, - თქვა მან და ისევ მოუწოდა საქართველოს მთავრობას მიხეილ სააკაშვილს საზღვარგარეთ მკურნალობის საშუალება მისცეს.