Прэзыдэнт Міжнароднай фэдэрацыі хакея пацьвердзіў адхіленьне ад сусьветнага хакея зборных Беларусі і Расеі
«Мы робім гэта з году ў год. У сэзоне 2022/2023 яны гуляць ня будуць», — заявіў ён.
Па словах Тардыфа, калі пачалася вайна ва Ўкраіне, «салідарнасьць сям’і ІІХФ была фантастычнай»: «Сотні гульцоў атрымалі магчымасьць паехаць гуляць у іншыя краіны Эўропы пры падтрымцы шматлікіх нацыянальных хакейных асацыяцый. Мы дапамаглі мужчынскай зборнай і зборнай да 18 гадоў выехаць на трэніроўкі за мяжу і атрымаць магчымасьць удзельнічаць у нашых турнірах».
28 лютага, праз чатыры дні пасьля поўнамаштабнага ўварваньня расейскай арміі ва Ўкраіну, Міжнародны алімпійскі камітэт (МАК) заклікаў міжнародныя спартыўныя фэдэрацыі не дапускаць да спаборніцтваў атлетаў з Расеі і Беларусі. Гэтая рэкамэндацыя была неадкладна і масава прынята да выкананьня.
У сакавіку рада ІІХФ адхіліла нацыянальныя зборныя Беларусі і Расеі ад удзелу ў ЧС-2022 (іх месцы занялі Францыя і Аўстрыя). На мінулым кангрэсе ІІХФ, які праходзіў 26–27 траўня ў фінскім Тампэрэ, беларускую і расейскую каманды пазбавілі права ўдзелу ў ЧС-2023, які пройдзе ў Латвіі і Фінляндыі.
Паводле зьвестак Беларускага фонду спартыўнай салідарнасьці, супраць Беларусі і Расеі ўвялі 134 спартыўныя санкцыі, у тым ліку 48 — у алімпійскіх відах спорту.