Агляд прэсы: Прыстасавацца да тупіку

Беларускія актывісты сочаць за рухам ваенных эшалонаў. Што стаіць за звальненнямі ва Украіне? Расея змагаецца з уласным народам. Анамальная спякота ў Еўропе – што рабіць? Падрабязнасці свежых матэрыялаў замежнай прэсы даведаемся ў аглядзе Радыё Рацыя.

«На працягу апошняга тыдня па чыгунцы Беларусі назіраецца ўзмацненне руху ваеннай тэхнікі. Пік актыўнай чыгуначнай перавозкі прыпадае на 15–16 ліпеня, асноўныя сілы былі перакінуты на Ельск, Брэст, Ваўкавыск, крыху менш — на Зяброўку і Іванава», – цытуе дадзеныя „Беларускага Гаюна» украінскае выданне Odessa Journal.

„Большая частка баявой тэхнікі была перакінута ў памежныя раёны. У асноўным гаворка ішла пра танкі Т-72б і Т-72б3, баявыя машыны пяхоты БМП-1 і БМП-2, шматмэтавыя плывучыя бронетранспарцёры МТ-ЛБ, а таксама 122-мм палкавыя самаходныя гаўбіцы 2С1 «Гваздзік». Акрамя гэтага з чыгуначнай станцыі Бронная Гара ў Расейскую Федэрацыю быў накіраваны яшчэ адзін эшалон з боепрыпасамі. Верагодна, экспарт боепрыпасаў з Беларусі ў Расейскую Федэрацыю звязаны з недахопам боепрыпасаў ва Узброеных Сілах РФ, асабліва пасля знішчэння складоў на акупаванай тэрыторыі Украіны. Калоны забеспячэння перакідваліся і ў іншыя напрамкі. Тую тэхніку, якую перакінулі ў памежныя з Украінай раёны, можна назваць «наступальнай». Але ва ўмовах, калі ідзе актыўны экспарт снарадаў у Расейскую Федэрацыю, прасоўваць тэхніку Узброеных Сіл Рэспублікі Беларусь нельга. Хіба пакуль можна сказаць, што яна не была забяспечана дастатковай колькасцю боепрыпасаў для наступальных дзеянняў. Такім чынам, перакідванне тэхнікі ў памежныя з Украінай раёны цалкам можа быць элементам «застрашвання», у адказ, напрыклад, на мініраванне ўкраінска-беларускай мяжы», – адзначае ўкраінскае выданне.

Прэзідэнт Украіны адхіліў ад пасады начальніка сакрэтнай службы і свайго сябра дзяцінства Івана Баканава, а таксама генеральнага пракурора Ірыну Венедыктаву. Перадумовай гэтаму паслужылі шматлікія падазрэнні ў дзяржаўнай здрадзе з боку супрацоўнікаў судовага апарата і органаў бяспекі Украіны. Еўрапейская прэса спрабуе зазірнуць за кулісы падзей.

Ірландская газета Irish Independent мяркуе, што гэтыя звальненні адлюстроўваюць не толькі страх перад расейскімі шпіёнамі і расчараванне спецслужбамі.

«Яны таксама паказваюць палітычную напружанасць, якая ўзнікла яшчэ ў даваенны перыяд, і ў значнай ступені паўстала на паўзу пасля ўварвання 24 лютага. Тыя, хто ўважліва сочыць за ўкраінскай палітыкай, заўважаць, што тут прысутнічае і фактар суперніцтва. Пераемнік генпракурора Венедыктавай Аляксей Сіманенка блізкі да кіраўніка адміністрацыі Зяленскага Андрэя Ермака. А Ермак на працягу многіх гадоў абвінавачваўся ў мностве грахоў, у тым ліку і ў тармажэнні антыкарупцыйных рэформ. Высочваць здраднікаў і расейскіх шпіёнаў – гэта адно, а вось арыентавацца ў шматграннай і расколатай украінскай унутранай палітыцы – зусім іншае», – падкрэслівае ірландскае выданне.

У Расеі створаны рэпрэсіўны і прапагандысцкі апарат, які затыкае рот апазіцыі – перш за ўсё тым, хто выступае супраць вайны ва Украіне, і ператварае шырокія пласты насельніцтва ў пакорлівых і абыякавых падданых. Законы аб кантролі над СМІ і аб «замежных агентах» у які раз узмацняюцца жорсткасцю. 

«Надзея на тое, што насельніцтва Расеі з-за вайны ва Украіне паўстане супраць Пуціна, аказалася цудоўнай фантазіяй, далёкай ад рэальнасці», – піша ірландская газета The Irish Times.

«Большасць расейцаў згодны з вайной супраць Украіны. Шмат хто з нас на Захадзе адмаўляецца прымаць гэты факт, паколькі мы проста не жадаем верыць у тое, што гэта можа быць праўдай. Аднак у рамках аўтарытарнага рэжыму часцяком куды лягчэй прыстасавацца да сістэмы, чым паспрабаваць яе змяніць. У выніку адчуванне бездапаможнасці і залежнасці бясконца самаўзнаўляецца і ўзмацняе ізаляцыянісцкія наратывы. Паводзіць сябе карэктна і злівацца з натоўпам – найлепшы са мноства вельмі непрыемных варыянтаў паводзінаў», – адзначае ірландскае выданне.

Спякота працягвае трымаць Еўропу ў напружанні: у адной толькі ў Партугаліі загінула больш за 1000 чалавек, у Германіі максімальная тэмпература дасягнула 40 градусаў, у Вялікабрытаніі прыйшлося часткова спыніць рух цягнікоў, працягваюць бушаваць лясныя пажары. Аглядальнікі заклікаюць да радыкальнага пераасэнсавання відаў і спосабаў барацьбы са змяненнем клімату. «Працоўнае заканадаўства павінна быць прыстасаванае да змен клімату», – патрабуе нямецкая газета Süddeutsche Zeitung.

«У гэтым «цудоўным новым свеце спякоты» патрэбны новыя, падрабязна распрацаваныя правілы. Грамадзяне маюць патрэбу ў праве на водпуск з прычыны спякоты. Працаваць, калі пот залівае вочы – тое яшчэ задавальненне. Калі працягваць працаваць у такую спякоту, то ўзрастае верагоднасць памылак і няшчасных выпадкаў. Неабходна абавязаць усе прадпрыемствы распрацаваць эфектыўныя планы па абароне супрацоўнікаў ад спякоты. Неабходна інфармаваць працоўныя калектывы аб небяспецы спякоты, і пра тое, што можна зрабіць для абароны ад яе. Так, наперадзе немалыя марнаванні. Але гэта даўно ўжо не з’яўляецца сюрпрызам: змены клімату ўляцяць нам у капеечку», – папярэджвае нямецкае выданне.

Беларускае Радыё Рацыя

Artykuł Агляд прэсы: Прыстасавацца да тупіку pochodzi z serwisu БЕЛАРУСКАЕ РАДЫЁ РАЦЫЯ.