რუსეთში დღე-ღამეში კორონავირუსით თითქმის 50 ათასი დაავადდა
ინფექციასთან ბრძოლის ოპერატიული შტაბის მონაცემების მიხედვით, რუსეთში (ანექსირებული ყირიმის ჩათვლით), კვლავ "დელტა" შტამი დომინირებს, რომელიც ახალ შემთხვევათა 52%-შია გამოვლენილი. ვარიანტი "ომიკრონი" და სხვა შტამები 48%-ს შეადგენს. "ომიკრონის" გავრცელება დღესდღეობით დაფიქსირებულია რუსეთის 57 რეგიონში.
კორონავირუსის სწორედ ამ ვარიანტს უკავშირებს ხელისუფლება ინფიცირების შემთხვევათა რიცხვის სწრაფ ზრდას მოსკოვში, სადაც ინფიცირებულთა რაოდენობა დღე-ღამეში თითქმის 40 პროცენტით გაიზარდა, და პანდემიის დაწყების შემდეგ, პირველად მიუახლოვდა 16 ათასს.
ამასთან, ჰოსპიტალიზებულთა რიცხვი მოსკოვში მცირედ იზრდება, რუსეთის მასშტაბით კი, ამ რიცხვმა იკლო კიდეც წინა დღესთან შედარებით. ოპერატიული შტაბის მონაცემებით, უკანასკნელი დღე-ღამის განმავლობაში, საავადმყოფოში გადაყვანილია 9136 პაციენტი, გამოჯანმრთელდა 24 719 ადამიანი, გარდაიცვალა 692 ავადმყოფი.
კოვიდ-19-ით დაავადებულთა რიცხვის ზრდა "ომიკრონის" შტამის გავრცელებასთან დაკავშირებით, მთელ მსოფლიოშია შესამჩნევი. ის უკვე დომინირებს დასავლეთ ევროპისა და აშშ-ის რიგ ქვეყნებში. ჯანდაცვის მსოფლიო ორგანიზაციის მონაცემებით, დაავადებულთა რაოდენობა მსოფლიოში ორმაგდება ყოველ სამ დღეში. ამასთანავე, სხვადასხვა ქვეყნის მეცნიერთა კვლევის მიხედვით, ინფიცირებულთა რაოდენობის ზრდას არ ახლავს ინფექციით გარდაცვლილთა რიცხვის ზრდა.
ამის ფონზე, რიგმა ქვეყნებმა კორონავირუსთან დაკავშირებული შეზღუდვების შემცირება დაიწყეს. ამის შესახებ პირველად დიდმა ბრიტანეთმა განაცხადა, სადაც 25 იანვარს გაუქმდება კოვიდ-საბუთების წარმოდგენა, ნიღბების სავალდებულო ტარება საზოგადოებრივ ადგილებში, და ასევე, რეკომენდაცია გაეწევა თანამშრომლების დაბრუნებას დატოვებულ სამუშაოებზე.
საფრანგეთი 2 თებერვლიდან გააუქმებს ნიღბების სავალდებულო ტარებას ღია სივრცეში; ასევე, კულტურული და სპორტული ღონისძიებების მონაწილეთა რაოდენობის შეზღუდვას, და აუცილებელ მოთხოვნას - კვირაში სამი დღით თანამშრომელთა დისტანციური მუშაობის რეჟიმზე გადაყვანის შესახებ.
ამას გარდა, მომავალი კვირიდან რესტორანში და გასართობ ღონისძიებებზე შესასვლელად, ასევე, საქალაქთაშორისო ტრანსპორტში, საჭირო გახდება ცნობა აცრის შესახებ. მისი მიღება მხოლოდ აცრის შემთხვევაშია შესაძლებელი.
20 იანვარს ჯანდაცვის მსოფლიო ორგანიზაციის საგანგებო ვითარების კომიტეტმა რეკომენდაცია გასცა საერთაშორისო მოგზაურობების დაშვების შესახებ ან შეზღუდვების შემცირების შესახებ ქვეყნებს შორის მოგზაურობისას.