პროტესტი და პოლიტიკური დაძაბულობა არჩევნების შემდეგ - რა არ უნდა გამოგრჩეს 4 ნოემბერს
პროტესტი, სადეპუტატო მანდატები და კონსტიტუციის სათუო ცვლილება
პოლიტიკური დაძაბულობისა და საპროტესტო აქციების ფონზე, „ქართული ოცნება“ აცხადებს, რომ შესაძლოა გადაიხედოს პირველი მოსმენით დამტკიცებული საკონსტიტუციო პროექტი და შეუძლებელი გახდეს, მაგალითად, 2024 წლამდე ვადამდელი არჩევნების სრულად პროპორციული სისტემით ჩატარება.
ოპოზიცია დარწმუნებულია, რომ „ოცნება“ საკონსტიტუციო პროექტის პოლიტიკური ბრძოლის ინსტრუმენტად გამოყენებას ცდილობს.
იმისათვის, რომ, მათ შორის - საარჩევნო სისტემასთან დაკავშირებული საკონსტიტუციო ცვლილებები დამტკიცდეს, სულ ცოტა, 113 დეპუტატის მხარდაჭერაა საჭირო. შესაბამისად, მანდატებზე უარის თქმის გადავადება მოუწიათ „ნაციონალური მოძრაობის“ დეპუტატებს.
„ქართულ ოცნებაში“ აცხადებენ, რომ პარლამენტში დარჩენას არავის შეეხვეწებიან და უფლებამოსილებას ყველა მსურველს მოუხსნიან. ასევე, ცინიკურად უყურებენ ენმ-ის მიერ შეცვლილ გადაწყვეტილებას.
„მიხვდნენ, რომ ეს მათი არაადეკვატური საქციელი არ იქნებოდა გამოსადეგი არც თავად მათთვის და ამის შემდეგ ცვლიან გადაწყვეტილებას... ეს შესაძლებელია იყოს განპირობებული მათი აგონიით, დაბნეულობით, მარცხით, რომელიც ისედაც იყო მოსალოდნელი, მაგრამ თავად მათ ამის არ სჯეროდათ“, - თქვა 3 ნოემბერს გამართულ პრესკონფერენციაზე ფრაქცია „ქართული ოცნების“ თავმჯდომარემ, მამუკა მდინარაძემ.
რა მოხდება თუ ხელისუფლება მართლაც შეცვლის კანონპროექტის ჩანაწერს? წაიკითხე ლელა კუნჭულიას სტატიაში.
სალომე ზურაბიშვილმა კიდევ ერთხელ გაიმეორა, რომ სააკაშვილს არ შეიწყალებს
საქართველოს პრეზიდენტი სალომე ზურაბიშვილი ამბობს, რომ მას მიხეილ სააკაშვილის შეწყალების საკითხზე გადაწყვეტილება არ შეუცვლია. „არა და არასდროს“ - კიდევ ერთხელ გაიმეორა მოქმედმა პრეზიდენტმა გუშინ საღამოს გამართულ ბრიფინგზე.
ზურაბიშვილმა თქვა: „ყოფილი პრეზიდენტი არც პოლიტიკური პატიმრობის და არც უდანაშაულობის მსხვერპლის არცერთ კრიტერიუმს არ აკმაყოფილებს. ის არის ნებაყოფლობით და არალეგალური გზით ქვეყანაში შემოღწეული მსჯავრდებული, რომლის შემოსვლას მიზნად ისახავდა დესტაბილიზაციას. ამის მიუხედავად, მაღალი საზოგადოებრივი და პოლიტიკური ინტერესისა. ის უნდა იყოს მიჩნეული განსაკუთრებულ პატიმრად, ეს მოითხოვს პენიტენციური ადმინისტრაციისგან და ხელისუფლებისგან განსაკუთრებულ ყურადღებას. ყველა ზომების მიღებას, რათა ჯანმრთელობის გაუარესება არ იქნას გამოყენებული პოლიტიკური სპეკულაციის ან დესტაბილიზაციის მიზნით“.
იმავე ბრიფინგზე პრეზიდენტმა პანდემიასთან დაკავშირებითაც ისაუბრა და ხელისუფლებას მიმართა რისკჯგუფებისთვის სავალდებულო გახადოს ვაქცინაცია. მისი თქმით, პანდემიის შეჩერების პროცესში პასუხისმგებლობა დიდია საპატრიარქოსთვის, რომელიც მისი თქმით, „თავს იკავებს და საშუალებას უტოვებს ცალკეულ სასულიერო პირებს, რომ იქადაგონ ანტივაქსერული პროპაგანდა“.
სალომე ზურაბიშვილი ბრიფინგამდე კათოლიკოს-პატრიარქსა და იუსტიციის მინისტრს შეხვდა. დღის ბოლომდე არსებობდა მოლოდინი, რომ შესაძლოა პრეზიდენტს მიხეილ სააკაშვილის შესახებ ახალი, წინასგან განსხვავებული განცხადება გაეკეთებინა, თუმცა საბოლოოდ მოლოდინი არ გამართლდა.
ამ თემაზე ასევე ნახე:
ზურაბიშვილი გამოეხმაურა იუსტიციის უმაღლესი საბჭოს ორი ახალი წევრის არჩევას
კოვიდ-პაციენტებს საქართველოში მონოკლონური ანტისხეულებით უმკურნალებენ
კოვიდ-პაციენტების სამკურნალოდ საქართველო მონოკლონური ანტისხეულების გამოყენებას იწყებს. ქვეყანაში უკვე შემოტანილია მონოკლონური ანტისხეულების 5000 დოზა, რომელთაგანაც, 3000 განკუთვნილი იქნება ჰოსპიტალიზებული პაციენტებისათვის, 2000 კი ბინაზე, ან კოვიდ-სასტუმროებში დარჩენილი ავადმყოფებისთვის.
თბილისის ინფექციური საავადმყოფოს დირექტორისა და პანდემიის კლინიკური მართვის გუნდის ხელმძღვანელის, თენგიზ ცერცვაძის თქმით, მონოკლონური ანტისხეულებით მკურნალობა საქართველოში 5-7 დღეში, ანუ დაახლოებით 10 ნოემბრიდან უნდა დაიწყოს. საერთაშორისო გამოკვლევების თანახმად, მონოკლონური ანტისხეულები მნიშვნელოვნად ამცირებს პაციენტის გამოჯანმრთელების პერიოდს, საავადმყოფოში დაყოვნების ვადას და რაც მთავარია, ამცირებს გარდაცვალების რისკს:
მონოკლონური ანტისხეული მექანიკური ბმით ანეიტრალებს ვირუსის სპაიკ ცილას და უჯრედთან ბმას. როგორც თენგიზ ცერცვაძე უხსნის რადიო თავისუფლებას, ბინაზე დარჩენილი პაციენტებისათვის მონოკლონური ანტისხეულებით მკურნალობის გადაწყვეტილებას ოჯახის ექიმები მიიღებენ. ამისათვის, მისი თქმით, ექიმები უკვე გადიან და მომავალშიც გაივლიან შესაბამის ტრენინგებს.
წაიკითხე ვრცლად ნინო თარხნიშვილის სტატიაში.
ელენე ხოშტარიამ შიმშილობა დაიწყო
მესამე პრეზიდენტის მიხეილ სააკაშვილის კლინიკაში გადაყვანის მოთხოვნით „დროას“ ლიდერმა ელენე ხოშტარიამ შიმშილობა დაიწყო. დღეს მისი შიმშილობის მეორე დღეა. ხოშტარია პარლამენტის შენობაში აპირებს შიმშილობის გაგრძელებას.
"მე არ წარმოვადგენ მიხეილ სააკაშვილის პარტიას. მეტსაც გეტყვით, მე არ ვარ მისი ამომრჩეველი. კიდევ უფრო მეტსაც ვიტყვი, მე არაერთხელ გამომითქვამს პრეტენზია და დღესაც მაქვს მის მიმართ, მაგრამ რაც დღეს ხდება მისი პატიმრობისა და ჯანმრთელობის მდგომარეობის გარშემო, ეს არის სადისტური და ცინიკური შურისძიება საქართველოს მოქალაქისა და მესამე პრეზიდენტის მიმართ. ეს საკითხი არის სახელმწიფო ინტერესების, შესაბამისად სააკაშვილის ჯანმრთელობის მდგომარეობისთვის საფრთხის შექმნა 1 პროცენტითაც კი არის აბსოლუტურად დაუშვებელი. მე გადავწყვიტე, რომ აქ პარლამენტში, რომელშიც მე არ შემოვსულვარ და არ ვაღიარებ, დავიწყო შიმშილობა, სანამ არ გადაიყვანენ სამოქალაქო კლინიკაში და სანამ მისი ჯანმრთელობის გარშემო არ მოიხსნება კითხვები", - თქვა ხოშტარიამ.
გუშინ მიხეილ სააკაშვილი კლინიკა „ვივამედის“ ანგიოლოგმა მოინახულა. ციხის ადმინისტრაციის განცხადებით სპეციალისტი სააკაშვილის პირადი ექიმის ნიკოლოზ ყიფშიძის მიწვევით მივიდა.
"დაგეგმილია, ასევე, პულმონოლოგის ვიზიტი, რომელიც ატარებს პრევენციულ ხასიათს, რადგან საუბარი იყო მ. სააკაშვილის წარსულში გადატანილი კოვიდინფექციის მძიმე ფორმის შესახებ", - ნათქვამია პენიტენციური სამსახური განცხადებაში.
გარდა ამისა პარასკევს იგეგმება სააკაშვილის მდგომარეობის შესახებ ექიმთა მეორე კონსილიუმის შეკრებაც.
თვალი ადევნე სიახლეებს ამ თემაზე რადიო თავისუფლების ახალი ამბების სექციაში.
პროტესტი რეგიონებში - ენმ-ს აქცია ქუთაისში ინაცვლებს
დღეს ქუთაისში „ერთიანი ნაციონალური მოძრაობა“ საპროტესტო აქციას გამართავს. ეს ამ კვირაში უკვე მესამე ქალაქია დასავლეთში, სადაც პარტიამ მხარდაჭერები შეკრიბა. მანამდე იყო ბათუმი და ზუგდიდი. 6 ნოემბერს კი ენმ თბილისში გეგმავს დიდ აქციას.
როგორც „ნაციონალური მოძრაობის“ ლიდერმა ნიკა მელიამ განაცხადა, აქციები გაგრძელდება მანამდე, სანამ კონკრეტულ შედეგს არ მიაღწევენ და მიხეილ სააკაშვილი არ გათავისუფლდება.
ამავე მოთხოვნით პროტესტი გრძელდება რუსთავში, #12 პენიტენციურ დაწესებულებასთან, რომელმაც მისი ორგანიზატორების თქმით, პერმანენტული იქნება.
თვალი ადევნე სიახლეებს ამ თემაზე რადიო თავისუფლების ახალი ამბების სექციაში.
ჩინეთი და რუსეთი გაეროსგან მოითხოვენ ჩრდილოეთ კორეისთვის სანქციების გაუქმებას
ჩინეთი და რუსეთი გაეროს უშიშროების საბჭოს მოუწოდებენ, სანქციები შეუმსუბუქოს ჩრდილოეთ კორეას. მათ მიერ წარმოდგენილ რეზოლუციის პროექტში ხაზგასმულია ჩრდილოეთ კორეის ეკონომიკური პრობლემები. მოსკოვი და პეკინი აცხადებენ, რომ სანქციები უნდა გაუქმდეს „სამოქალაქო მოსახლეობის ცხოვრების დონის გასაუმჯობესებლად.“ ისინი მოითხოვენ, გაუქმდეს სანქციები ზღვის პროდუქტებისა და საფეიქრო ნაწარმის ექსპორტზე და რაფინირებული ნავთობის იმპორტზე. რუსეთი და ჩინეთი ასევე მოითხოვენ, გაუქმდეს აკრძალვა ჩრდილოეთ კორეის მოქალაქეების უცხოეთში დასაქმებაზე.
რეზოლუციის პროექტზე, რომელიც გაეროს უშიშროების საბჭოს წევრებს დაურიგდათ, Associated Press-ი და Reuters-ი იტყობინებიან.
წაიკითხე მეტი.
სუს-ი: მოქალაქეები განზრახ თუ გაუცნობიერებლად პირდაპირ მოუწოდებენ თანამოაზრეებს რევოლუციისკენ
სახელმწიფო უსაფრთხოების სამსახური აცხადებს, რომ სოციალური ქსელებითა თუ მასობრივი ინფორმაციის საშუალებებით, მოქალაქეთა ნაწილი ისეთი ტიპის ინფორმაციას ავრცელებს, რომელსაც უწყება რევოლუციისკენ მოწოდებად აღიქვამს. უწყებაში აღნიშნავენ, რომ მსგავსი მოწოდება, შესაძლოა, სისხლის სამართლის დანაშაული იყოს, რომელიც 3 წლამდე პატიმრობას ითვალისწინებს.
წაიკითხე მეტი.
რატომ მიდიოდნენ საზღვარგარეთ ადრე და რატომ მიდიან ახლა - მიზეზები იცვლება
სიღარიბე
- ეს არის ძირითადი მიზეზი, რის გამოც 30 წელია საქართველოს მოქალაქეები საზღვარგარეთ მიდიან. თუმცა, სტატისტიკის ანალიზი აჩვენებს, რომ დამოუკიდებლობის მოპოვების შემდეგ ემიგრაციის პროცესებზე სხვადასხვა დროს დამატებით სხვა მიზეზებიც მოქმედებდა.
სტატისტიკის ეროვნული სამსახურის მონაცემებით, საქართველოდან ემიგრაციაში ყოველწლიურად 100 ათასამდე ადამიანი მიდის. შედარებით ნაკლები იყო 2020 წელს, კოვიდპანდემიის პერიოდში - 75 ათასამდე.
ექსპერტი მიგრაციის საკითხებში თამაზ ზუბიაშვილი ამბობს, რომ საქართველოდან საზღვარგარეთ წასულების რაოდენობა ყოველწლიურად მატულობს. ზუსტი რიცხვი არ არსებობს, მაგრამ, მისი ვარაუდით, საქართველოდან უკვე მილიონ-ნახევარი ადამიანია გასული, რაც 3 მილიონ 700 ათასი კაცის კვალობაზე ძალიან მაღალი მაჩვენებელია.
„ზოგადად, ემიგრაციის ძირითადი მიზეზი ყოველთვის ეკონომიკური სიდუხჭირეა“, - ამბობს ის.
ამ ძირითადი მიზეზის გარდა არის სხვა გარემოებებიც.
თავდაპირველად, როდესაც საქართველო დამოუკიდებელი გახდა, ეთნიკური ჯგუფები (ბერძნები, ებრაელები, რუსები...) მასობრივად დაბრუნდნენ საკუთარ სამშობლოში.
„ინტენსიური მიგრაცია თითქმის 10 წელი გრძელდებოდა, მერე შედარებით იკლო, მაგრამ დღემდე უფრო მეტი ადამიანი გადის, ვიდრე შემოდის“, - ამბობს თამაზ ზუბიაშვილი.
წაიკითხე ვრცლად თეა თოფურიას სტატიაში.
"როცა ჩამოვედი და მოვისმინე ქართველი ხალხის პოზიცია, ჩემი აზროვნება შეიცვალა იმ მხრივ, რომ აქ ომზე არ ფიქრობენ, აქ ხალხს შერიგება სურს. 30 წლის მანძილზე ეს კონფლიქტი გრძელდება და სიტუაცია მწვავდება. არ მინდა, რომ ეს გაგრძელდეს...“ - ქართველებისა და აფხაზების მეგობრობაზე გადაღებული პოპულარული ვიდეოს ავტორი, 26 წლის დაურ ბუავა ერთი თვეა, საქართველოში მოგზაურობს და თავის ახალ მეგობართან, შმაგისთან ერთად Tik-Tok ვიდეოებს იღებს.