Rusia ia ofron Shqipërisë vaksinën kundër koronavirusit
“Nuk kemi dyshime se Rusia është e gatshme të sjellë vaksinën e saj "Sputnik-V" edhe në Shqipëri. Vaksinimi me "Sputnik-V" tashmë filloi në Rusi dhe në Argjentinë, ndërkohë më shumë se 50 vende kanë aplikuar për të blerë 1,2 miliardë doza të preparatit”, ka shkruar ambasada ruse në Shqipëri.
Diplomatët rusë e kanë ndërlidhur këtë ofertë me një postim të drejtorit të zyrës për Komunikim me Publikun, në Qeverinë e Shqipërisë, Endri Fuga, në të cilin ai e quan lajm të mrekullueshëm fillimin e shpërndarjes së vaksinës kundër koronavirusit të kompanisë Pfizer BioNtech, në vendet e Bashkimit Evropian.
Në atë postim Fuga thotë se “e gjithë popullata e vendeve të Ballkanit Perëndimor mund të krahasohet me atë të një vendi anëtar të BE-së”, duke shtuar se në pandemi BE-ja mund të jetë e sigurt nëse janë edhe fqinjët e saj.
Video nga arkivi:
Rusia e ka miratuar vaksinën Sputnik V më 11 gusht, duke e bërë atë vaksinën e parë të koronavirusit që fiton miratimin zyrtar.
“Sputnik-V” është licencuar për përdorim në Rusi, pas dy muajsh prova në njerëz.
Ekspertët thonë se provat ishin shumë të pakta për të dëshmuar efektivitet dhe siguri.
Shtetet e Bashkuara, Bashkimi Evropian dhe një sërë vendesh tjera kanë miratuar vaksinën kundë koronavirusit të kompanive Pfizer dhe BioNtech dhe kanë filluar vaksinimin e të moshuarve dhe punonjësve shëndetësorë.