რუსეთისა და თურქეთის სამხედროებმა ხუთშაბათს მონაწილეობა მიიღეს ბრძოლებში სირიის პროვინცია იდლიბში
რუსეთისა და თურქეთის სამხედროებმა ხუთშაბათს მონაწილეობა მიიღეს ბრძოლებში სირიის პროვინცია იდლიბში, სადაც შეიარაღებული ოპოზიციის შენაერთებმა სცადეს სირიის პრეზიდენტ ბაშარ ალ-ასადის არმიისთვის წაერთმიათ ადრე დაკარგული ტერიტორიები.
კონფლიქტის ორი მხარის მრავალრიცხოვანი ცნობების თანახმად, ოპოზიციის რაზმებმა თურქეთის არტილერიის მხარდაჭერით დაიწყეს იერიში დასახლებულ პუნქტ ნაირაბზე. რუსეთის თავდაცვის სამინისტროს განცხადების თანახმად, მას შემდეგ, რაც ოპოზიციის შენაერთებმა მოახერხეს სირიის არმიის თავდაცვის გარღვევა, რუსეთის თვითმფრინავებმა დარტყმები განახორციელეს მათ წინააღმდეგ.
„ამან სირიის ჯარებს ყველა იერიშის წარმატებით მოგერიების საშუალება მისცა“, ნათქვამია ცნობაში, რომელიც ასევე შეიცავს თურქეთისადმი მოწოდებას, „ინციდენტების თავიდან ასაცილებლად შეწყვიტოს ტერორისტების მოქმედებების მხარდაჭერა“ (რუსეთი ასე უწოდებს სირიის ოპოზიციურ ძალებს).
თურქეთის თავდაცვის სამინისტროს განცხადებაში ნათქვამია, რომ ავიადარტყმების შედეგად იდლიბში დაიღუპა თურქეთის ორი სამხედრო მოსამსახურე და ხუთი დაიჭრა. ამასთან, ავიადარტყმებისთვის პასუხისმგებლობა ეკისრებათ სირიის სამთავრობო ძალებს. ანკარა იტყობინება, რომ ამის შემდეგ თურქეთის ჯარებმა ასადის ძალებს საპასუხო საარტილერიო დარტყმები მიაყენეს.